Бүгүн «Таксиһы өлөрүүгэ уорбаланааччыны була иликтэр» диэн иһитиннэриим бэчээттэммитэ. Онно бэҕэһээ, ыам ыйын 23 күнүгэр, Дьокуускай куорат таһынааҕы Газовиктар бөһүөлэктэрин 27 №-дээх дьиэтин таһыгар эдэр киһи өлүгэ көстүбүтүн туһунан суруйбутум.
Вера МАКАРОВА, «Саха сирэ» хаһыат, edersaas.ru
Бу чахчынан силиэстийэ уорганнара «Киһини соруйан өлөрүү» ыстатыйанан холуобунай дьыала тэрийбиттэрэ. 32 саастаах саха киһитэ сүрэххэ быһаҕынан анньыллыбыт.
Өлүөхсүт «Тойота Корона» массыынатын Чернышевскай уулусса оройуонуттан булбуттар — уоттуу сатаабыттар.
Дьокуускай куорат полициятын пресс-сулууспата иһитиннэрбитинэн, бу өлөрүүгэ уорбаланааччылары туттулар — Өлүөхүмэттэн төрүттээх 22 уонна 23 саастаах, урут сууттана сылдьыбатах урдустар. Буруйдарын билиммиттэр.
Уорбаланааччылары ИДьМ холуобунай ирдэбилин уонна Дьокуускай куорат полициятын оперативниктара туппуттар.
Санатар буоллахха, өлүөхсүт — Айаал Николаев, 1985 сыллаах төрүөх, 9 саастаах кыыс тапталлаах аҕата, ойоҕо иккис оҕотунан хат, ипотеканан ылбыт дьиэлээхтэр, дьонун соҕотоҕун иитэн олорбут.
Бэҕэһээ киин куорат Комсомольскай болуоссатыгар такси сулууспаларын суоппардара мустан, Айаал дьонун кытта көрсүбүттэр, харчы хомуйан көмөлөспүттэр.
Аймахтара Дьокуускай куорат олохтоохторуттан көрдөһөллөр: уолу дойдутугар таһаарарга «УАЗ» массыына наада итиэннэ баҕалаахтар, бука диэн, Сбербаан 4276 7600 5130 9407 нүөмэрдээх каартатыгар, SARGYLANA KUGASOVA аатыгар (өлүөхсүт кэргэнэ) харчы ыытан, төһө кыалларынан көмөлөһөргүтүгэр.
Вера МАКАРОВА, «Саха сирэ» хаһыат, edersaas.ru
Хаартыска: РФ СК Саха сиринээҕи управлениета.