Чурапчы улууһун борокуратуурата надзордааһын бэрээдэгинэн, улуустар, куораттар икки ардыларыгар сылдьар үгүс такси өҥөтүн оҥорор урбаанньыттар уонна да атын дьон суол быраабылаларын кэһэн, олорсон иһэр дьон олоҕор уонна доруобуйатыгар кутталлаах өҥөнү оҥороллорун быһаарда.
Ол курдук, массыыналарга эбии олорор миэстэ туруораллар, гаас баллуонун массыына иһигэр угаллар, массыына үрдүгэр көҥүллэммэт ыарахан ыйааһыннаах таһаҕас тиэнэллэр, атын да кэһиини оҥороллор.
Өскөтүн такси суоппара сыл иһинэн РФ Административнай кодексатын 12.5-с ыстатыйатын 1 чааһынан (холобура, эбии олоппос олордон) эппиэтинэскэ тардылла сылдьыбыт эрээри, эбии олорор миэстэни төттөрү кэтэрдэн дьону тиэйэр, өҥөтө куттал суох буолуутугар эппиэттэспэт буоллаҕына, РФ Холуобунай кодексатын 238-с ыстатыйатын 1 чааһынан холуобунай эппиэтинэскэ тардыллыан сөптөөх.
РФ Холуобунай кодексатын 238-с ыстатыйатын 1 чааһынан, олоххо уонна доруобуйаҕа куттал суох буолуутугар эппиэттэспэт өҥөнү оҥоруу 300 тыһ. солк. сууммалаах ыстараап төлүүртэн саҕалаан, 2 сылга диэри болдьоххо көҥүлү быһыыга тиэрдиэн сөптөөх.
Бу сыл устатыгар хас да улууска такси суоппардара тутуллан, итинник холуобунай эппитинэскэ тардыллыбыттара, ол иһигэр Чурапчыга икки киһи.
Иван Ядреев, Чурапчы улууһун борокуруора, юстиция сүбэһитэ.
Хаартыска: интэриниэттэн.