Соторутааҕыта Горнай улууһугар Бэрдьигэстээх уонна Маҕарас икки ардыгар икки оҕолоох тайаҕы өлөрбүттэрин, оҕолоро иккиэн кыралара, акаарычааннара бэрт буолан дьону батыһалларын, хата, олору өрүһүйбүттэрин туһунан суруйан турабыт.
Бу ийэ тайаҕы кимнээх өлөрбүттэрин Горнайдааҕы полиция үлэһиттэрэ көрдүү сылдьаллар диэн этэллэр. Көҥүлэ суох бултааһын бобулларын үрдүнэн, хомойуох иһин, итинник түбэлтэлэр тахса тураллар.
Бэс ыйын 28 күнүгэр Ленскэй улууһугар Ньүүйэ үрэххэ күлүмэнтэн, бырдахтан куотан ууга киирбит тайаҕы бырааттыы убайдыылар өлөрбүттэрин туппуттар.
Дьулустаан Дьяконов, СӨ Айылҕа харыстабылын министиэристибэтигэр булт управлениетын начаалынньыгын солбуйааччы:
-Тайах баччаларга үөнтэн-көйүүртэн куотан ууга киирэр үгэстээх. Мотуордаах оҥочолорунан айаннаан истэхтэринэ, Ленскэйдээҕи айылҕа харыстабылын иниспиэктэрдэрэ уонна полиция үлэһиттэрэ тохтотон бэрэбиэркэлээбиттэр. Итиэннэ саҥа өлөрүллүбүт тайах этин булбуттар. Карабин «сайгалаахтарын» туппуттар. Кыылы көҥүлэ суох бултааһын иһин Ленскэйдээҕи полиция холуобунай дьыала тэрийиэҕэ.
Александр ТАРАСОВ, «Саха сирэ» хаһыат, edersaas.ru