Бэстибээл чэрчитинэн, Олунньу 24 күнүгэр норуот дьокутаата Виктор Федоров өйөөн Строительнай уокурук олохтоохторо Лермонтов уулуссатын 29/1 дьиэтин таһынааҕы былаһааккаҕа муһуннулар.
Күн тыган турдаҕына ким дьиэҕэ сытыай, оннооҕор ыаллыы уокурук дьоно кэлэн дьаарбайан бардылар. Тэрийээччилэр дьону барытын блинынан уонна итии чэйинэн күндүлээтилэр. Ыытааччылар оҕолорго минньигэс бириистээх оонньуулары ыытаннар дьон сүргэтэ көтөҕүлүннэ. Кырдьаҕастыын эдэрдиин бары А.Е. Кулаковскай аатынан норуоттар доҕордоһууларын дьиэтин «Дьаам чуораннара» ансаамбылын ырыатын үөрэ-көтө иһиттилэр.
«Тахсан күүлэйдээ!» бэстибээл «Куорат тупсаҕай эйгэтин тэрийии» бырайыак чэрчитинэн, Арассыыйа тутууга, олоххо-дьаһахха уонна хомунаалынай хайааһыстыбаҕа министиэристибэтэ ааспыт сыл ахсынньытыттан тэрийэр.
Бырагыраамманан элбэх кыбартыыралаах дьиэлэр тастарыгар, сквердэргэ, дьон мустар сиригэр араас дьаармаркалар, спортивнай күрэхтэһиилэр, бэстибээллэр уонна да атын тэрээһиннэр ыытыллаллар.
Николай Попов, «Саха сирэ» хаһыат, edersaas.ru