Новосибирскайга Таджикистан өрөспүүбүлүкэтин генеральнай консула Шамсиддин Зарди Саха сиригэр кэллэ. Бу туһунан СӨ Тас сибээскэ департаменын пресс-сулууспата иһитиннэрдэ.
Ыалдьыт СӨ Тас сибээскэ департаменын салайар Владимир Васильевтыын көрүстэ. Кинилэр Саха сирэ уонна Таджикистан өрөспүүбүлүкэтэ бииргэ үлэлээһиннэрин олохтооһун, сайыннарыы туһунан кэпсэттилэр. Дьыалабыай кэпсэтии кэнниттэн господин Зарди салгыы Дьокуускай куорат баһылыгын Айсен Николаевы, Саха сирин атыы-эргиэн промышленнай палататын бэрэсидьиэнин Владимир Членовы, Дьокуускайга МИД бэрэстэбиитэлин Николай Дьяконовы кытары көрүстэ. Ол кэнниттэн Шамсиддин Зарди Саха сиригэр олорор Таджикистан өрөспүүбүлүкэтин гражданнарын, “Сомониен” община бэрэстэбиитэллэрин кытары көрсүөҕэ.
* * *
Таджикистан өрөспүүбүлүкэтин Генеральнай консульствота Новосибирскайга 2017 сыллаахха тэриллибитэ. Генконсульствоны салайыыга Сибиир уонна Уһук Илин федеральнай уокуруктар киирсэллэр.