Бүгүн, от ыйын 12 күнүттэн, Хаҥалас улууһун «Орто дойду» этнокомплексыгар «ТАБЫС» («Таптаа, алҕаа, байыт ытык сиргин») диэн ыччат бэстибээлэ саҕаланна. Уруккута бу тэрээһин Ыччат ыһыаҕа диэн ыытыллара, ол эрээри бу сылтан таһыма, бырагыраамата уларыйда.
«ТАБЫС» үөрүүлээх арыллыытыгар СӨ ыччат бэлиитикэтин уонна социальнай коммуникацияларга миниистирэ Степан Саргыдаев: «Бүгүн ыччат өрө күүрүүлээх, күүстээх, көхтөөх, тоҕо диэтэххэ биһиги Саха сирин ыччатын историятыгар бастакытын ыытыллар бэстибээлгэ муһуннубут. Мантан ыла «ТАБЫС» бэстибээл өрөспүүбүлүкэбит ыччатын саамай улахан бырааһынньыгынан — эйэ, доҕордоһуу, сайдыы бырааһынньыгынан буолуоҕа. Кэлэр үс күн иһигэр Саха сирин араас муннугуттан кэлбит ыччаппыт тугу сатыырын, туох кыахтааҕын билиэхпит-көрүөхпүт. Бэстибээл күннэрэ мустубут дьоҥҥо туһалаахтык ааһыахтара диэн эрэнэбин«, — диэн эҕэрдэ тылын тиэртэ.
Быйыл Хаҥалас улууһугар кинээс уонна Хаҥалас бастакы баһылыга, Саха уобалаһын бастакы талыллыбыт баһылыга (1739 с.) Соппуруон Сыраанап төрөөбүтэ 300 сыллаах чиэстээх сылын биллэрбиттэрэ. Онон бэстибээл арыллыыта манна ананна. Хаҥалас дьоно-сэргэтэ тэтимнээх, сэргэх тэрээһини бэлэмнээбиттэр. Маны сэргэ Хаҥалас ыччатын өрөгөй ырыатын улуус айар куттаах ыччата бэлэх уунна. «Дархан сахалар» ырыаны Христофор Горохов — Элгэстэй суруйбут, оттон Милена Борисова матыыптаабыт эбит.
Бүгүн бэстибээл үөрүүлээх арыллыытын кытта «МИР» («Молодежная инициатива в республике») диэн дьыалабыай оонньуу, дебат, ыччат бэлиитикэтин бастыҥ эдэр исписэлииһин, салайааччытын быһаарар куонкурус уонна «Эдэр маастар» диэн уустар күрэхтэһиилэрэ ыытылынна.
Бэстибээлгэ кытта 20 улуус уонна биэс уопсастыбаннай тэриллии хамаандалара кэллилэр. Эдэр дьон балаакканан «Орто дойдуга» от ыйын 15 күнүгэр диэри хоно сытан, дьыалабыай, култуурунай уонна спортивнай тэрээһиннэргэ көхтөөхтүк кыттыахтара.
Айтана Аммосова, edersaas.ru
Андрей Сорокин хаартыскаҕа түһэриилэрэ.