Бу күннэргэ Бүлүүгэ «Табыс» ыччат бэстибээлэ буола турар. Өрөспүүбүлүкэ араас муннугуттан 18 хамаанда тоҕуоруһа муһунна. Бүлүү куорат «Хомустаах» комплексыгар бэстибээл бырагыраамата күөстүү оргуйар.
Көхтөөх ыччат өрөспүүбүлүкэ тэриллибитэ 100 сылын хоһуйан араас туруорууну көрдөрдүлэр. Маныаха дьоруойдарынан Максим Аммосов, Платон Ойуунускай, Исидор Барахов, Степан Аржаков буоллулар. Кыттааччылар киэн туттар дьоммутун, устуоруйабытын бэрт итэҕэтиилээхтик көрдөрдүлэр. Хамаандалар бары көстүүм арааһын оҥостубуттар, декорация илдьэ кэлбиттэр. Бастыҥнары П.А.Ойуунускай аатынан Саха академическай тыйаатырын дириэктэрэ Петр Макаров салалталаах дьүүллүүр сүбэ көрдө-иһиттэ.
Бу түһүмэххэ бастыҥнарынан Бүлүү оройуонун уонна Устудьуон тутар этэрээтин хамаандалара ааттаннылар.
«Табыс» бэстибээл Саха АССР тэриллибитэ 100 сылыгар, Саха сиригэр Ийэ сылыгар, Арассыыйаҕа норуоттар култуурунай үгэстэрин сылыгар ананан буола турар.
СИА.