«ТАБЫС» ыччат бэстибээлигэр Мэҥэ Хаҥалас хамаандата бастаата

Бүгүн Хаҥалас улууһун «Орто дойду» этнокомплексыгар «ТАБЫС» ыччат бэстибээлин сабыллыыта буолла. Кыайыылаах хамаанданан Мэҥэ Хаҥалас улууһа буолла.

Үс күн устата 20 улуус уонна 5 уопсастыбаннай тэриллии хамаандалара култуурунай, дьыалабыай уонна спортивнай тэрээһиннэргэ күрэхтэстилэр. Бэстибээлгэ уопсайа 625 ыччат кытынна.

Бэстибээл сабыллыыытыгар кыттааччылар ааттарыттан 2039 сылга арыллар кэм капсулатыгар угуллар илдьити Хаҥалас улууһун ыччатын лидерэ Айсен Федоров  ааҕан иһитиннэрдэ. Оттон ыччат миниистирин Степан Саргыдаевы кытта улуус бэрэстбиитэллэрэ капсуланы үөрүүлээх быһыыга-майгыга Хаҥалас улууһун култууратын управлениетын начаалынньыгар Сахая Громоваҕа  туттардылар. Капсула 2039 сылга диэри Гавриил Ксенофонтов аатынан кыраайы үөрэтэр мусуойга хараллыаҕа.

Чурапчы Чакырыттан төрүттээх Настя Алексеева «Табыс» диэн ырыа айбытын сүрэхтээтэ. «Кэлин тэрийээччилэр бу ырыаны бэстибээл өрөгөй ырыатынан оҥороллоро буоллар», — диэн баҕа санаалаах ырыа ааптара.

Түмүккэ кыайыылааҕынан Мэҥэ Хаҥалас улууһун хамаандата буолла уонна «УАЗ» микроавтобус массыына хаһаайынынан буоллулар. Иккис миэстэ Хаҥалас улууһа буолла, кинилэр «ЭгоПласт» тэрилтэттэн 300 тыһ. солк. тутан үөрдүлэр-көттүлэр. Үһүс миэстэ Бүлүү улууһа буолла уонна «Тимир Строй Сервис» тэрилтэттэн 150 тыһ. солк. сэртипикээтинэн наҕараадаланнылар.

Оттон  ХИФУ устудьуоннарын идэлээх сойууһа уопсастыбаннай тэриллиилэргэ бастаата. Иккис — Ил Түмэн иһинэн тэриллибит Ыччат парламена, үһүс — «Дойду ситимэ» Мэҥэ Хаҥалас ыччатын түмсүүтэ. Кинилэр 150 тыһ., 100 тыһ., 70 тыһ. солк харчынан наҕараадаланнылар.

Санатан эттэххэ, «ТАБЫС» ыччат бэстибээлэ от ыйын 12-14 сылларыгар ыытылынна.

Айтана Аммосова, edersaas.ru