«ТАБЫС» бэстибээл кыттааччылара ыччат бэлиитикэтин туһунан сокуон уларыйарыгар этиилэри киллэрдилэр
Хаҥалас улууһун «Орто дойду» этнокомплексыгар «ТАБЫС» («Таптаа, алҕаа, байыт ытык сиргин») диэн ыччат бэстибээлэ буола турар. Бу чэрчитинэн ыччат судаарыстыбаннай бэлиитикэтин сокуонун уларытыыга дьыалабыай оонньуу ыытылынна.
Быйыл Ыччат дьыалаларыгар уонна социальнай коммуникацияларга министиэристибэ иһинэн тэриллибит Уопсастыбаннай сэбиэт чилиэннэрэ бэйэлэрэ көҕүлээн бэстибээл иһинэн дьыалабай былаһаакка тэрийдилэр. Маныаха ыччат судаарыстыбаннай бэлиитикэтин сокуонугар олоҕуран дьыалабыай оонньуу толкуйдаатылар. Араас улуустан мустубут ыччаты хамаандаларга арааран сорудахтары түҥэттилэр. Эдэр дьон ыччат бэлиитикэтин министиэристибэтин, оройуон, нэһилиэк дьаһалтатын исписэлииһинэн, НКО уонна урбаан эйгэтигэр холонон, сокуонҥҥа уларыйыы, эбии-көҕүрэтии киирэрин дьүүллэстилэр.
Василий Данилов, Ыччат дьыалаларыгар уонна социальнай коммуникацияларга министиэристибэ Уопсастыбаннай сэбиэтин бэрэссэдээтэлэ:
— Биһиги өрөспүүбүлүкэбит 1998 сыллаахха Арассыыйаҕа биир бастакынан ыччат судаарыстыбаннай бэлиитикэтин туһунан сокуону ылыммыта. Онтон ыла элбэх кэм ааста, онон сокуоҥҥа уларыйыылар киириэхтэрин наада диэн көрөбүт. Дьыалабыай оонньууга улуустар ыччатын лидердэрин, уопсастыбаннай тэриллиилэр салайааччыларын ыҥырдыбыт, биэс хамаандаҕа араардыбыт. Ыччаттан киирбит этиилэри хомуйан, уопсастыбаннай балаата «Законотворец» бырайыагар салгыы хамсатыахпыт.
«Россмолодежь» федеральнай экспера Максим Косенко, Ил Түмэн дьокутаата Александр Сусоев, Чурапчы ыччатын сэбиэтин бэрэссэдээтэлэ Айтал Керемясов дьыалабыай оонньууну көрдүлэр-иһиттилэр, ыччакка көмө буоллулар.
Айтана Аммосова, edersaas.ru