Ил Дархан «ТАБЫС» ыччат бэстибээлин кыттааччыларын кытта көрүстэ
Хаҥалас улууһун «Орто дойду» этнокомплексыгар «ТАБЫС» («Таптаа, алҕаа, байыт ытык сиргин») диэн ыччат бэстибээлэ буола турар. Бүгүн бэстибээл кыттааччыларын кытта Ил Дархан Айсен Николаев көрүстэ.
Көрсүһүү «Диалог на равных» бырайыак форматынан ыытылынна. Мустубут ыччат интэриэһиргиир боппуруостарын ыйыттылар.
Бастакы боппуруоһу Ыччат миниистирэ Степан Саргыдаев ыйытта:
— Айсен Сергеевич, эн 25 саастааххар дьокутаат буолбутун, оччолорго олоххо тутуһар санааларыҥ туох диэн этилэрий? Оттон билигин?
Ил Дархан Айсен Николаев:
— Өлөөн улууһуттан биир мандааттаах уокурукка парламент дьокутаата буолбутум, 13 киһиттэн талыллыбытым. Ол рекорду ким да куоһара илик. Киһи бу олоҕу үтүө оҥороору, сайыннараары кэлэр дии саныыбын. Оччоттон баччаҕа диэри бу санааны тутуһан кэллим. Киһи чиэһинэйдик уонна суобастаахтык үлэлиэхтээх. Мин сыалым биир — Саха сирин олохтоохторо баайдык уонна дьоллоохтук олороллорун баҕарабын.
Салгыы ХИФУ устудьуоннарын идэлээх сойууһуттан Светлана Колодезникова ыйытта:
— Айсен Сергеевич, устудьуонньуу сылдьан ханнык уопсастыбаннай тэриллиигэ сылдьыбыккыный?
Ил Дархан Айсен Николаев:
— Мин устудьуоннуурум саҕана оннук улахан тэриллиилэр суохтара. Москваҕа үөрэнэр саха ыччата буоламмыт «Саха-Москва» диэн хамсааһыны тэрийбиппит. Ол кэнниттэн атын киин куораттарга үөрэнэр саха устудьуоннара түмсүүлэнэн барбыттара.
Алексей Иннокентьев, Ыччат парламенын чилиэнэ:
— Биһиги ыччакка Саха сирин историятынан тургутук оҥорбуппут, онно 5000 киһи кыттыбыта. Тургутук түмүгүн ылан көрдөххө, ортотунан ыллахха, сүүрбэттэн 12-13 эрэ ыйытыкка сөп хоруй киирбитэ. Айсен Сергеевич, оскуолаҕа уонна орто, үрдүк үөрэх кыһаларыгар Саха сирин историятын үөрэтэр уруогу киллэриини туох дии саныыгытын?
Ил Дархан Айсен Николаев:
— Үөрэтиэххэ наада дии саныыбын, бу этиини өйүүбүн.
Маны таһынан ыччат 202-с уураах, доруобуйа харыстабылын, ыччат үлэлээх буолуутун, урбаан туһунан ыйыттылар.
Салгыы «Эдэр ыал», кроссфит, дьыалабыай оонньуу күрэхтэһиилэрэ ыытыллыахтара.
Айтана Аммосова, edersaas.ru
Анатолий Щербаков хаартыскалара.