Табаны иитиини өйөөһүнү 15%  үрдэтиэхтэрэ

Ааптар: 
Бөлөххө киир:

Саха сирин былаастара табаны иитиини өйөөһүнү 15%  үрдэтиэхтэрэ.

Саха сиригэр табаны энчирэппэккэ иитиигэ уонна ахсаанын элбэтиигэ тус сыаллаах үлэ ыытыллар. Сыл устата таба ахсаана өрөспүүбүлүкэ хаһаайыстыбаларыгар 4,5 тыһыынчанан элбээтэ. 2022 сылга таба иитиитин өйөөһүҥҥэ 928 мөл солк. ордугу көрүөхтэрэ, бу 2021 сыллааҕар 15 бырыһыанынан элбэх.

Өрөспүүбүлүкэ баһылыга Айсен Николаев бэлиэтээбитинэн, эдэр табаһыттары өйөөһүҥҥэ ураты болҕомто ууруллар. “2019 сыллаахха биһиги Арктиканы сайыннарыыга уонна Хоту дойду норуоттарын дьыалаларыгар министиэристибэтин нөҥүө “Эдэр табаһыт” аадырыстаах бырагырааманы үлэлэттибит. Бырагыраама көмөтүнэн 35 саастарыгар диэри дьиэ табатын иитэр табаһыттар олорор дьиэ атыылаһалларыгар эбэтэр тутталларыгар 1-дии мөлүйүөн солкуобайы ылар кыахтаахтар”, — диэтэ Айсен Николаев.

Быйыл “Эдэр табаһыт” бырагырааманан 1-дии мөл солкуобай суумалаах төлөбүрү Саха сирин араас оройуоннарыттан 20 табаһыт ылла. Кинилэр ортолоругар Арктика оройоуннарын олохтоохторо (Анаабыр, Булуҥ, Эдьигээн, муома, Өлөөн, Усуйаана), ону тэҥэ Алдан, Нерюнгри, Кэбээйи, Өймөкөөн оройуоннарыттан бааллар.

СӨ Тыа хаһаайыстыбатын миниистирин солбуйааччы Прокопий Николаев бэлиэтииринэн, министиэристибэ нөҥүө таба хаһаайыстыбаларыгар табаны иитэр баазалар, харааллар тутуллаллар, снегоход, вездеход тиэхиньикэ атыылаһыллар. Ону тэҥэ чуум үлэһиттэрин социальнай өттүнэн өйөөһүн боппуруостарыгар болҕомто ууруллар.

Кэлэр сылга Саха сиригэр табаны иитиини биллэрдик улаатыннарыахтара – өскөтүн 2021 сылга 787,8 мөл солк. көрүллүбүт буоллаҕына, 2022 сылга 928,9 мөл солк. ыытыахтара. Бу табаны иитэр хаһаайыстыбаларга дохуоту, табаһыттарга уонна чуум үлэһиттэригэр хамнаһы үрдэтиэҕэ, ону тэҥэ оҥорон таһаарыы көдьүүһүн.

Санатан эттэххэ, Саха сирэ дьиэ табатын ахсаанынан Арассыыйаҕа үһүс миэстэлээх. Өскөтүн 2020 сылга өрөспүүбүлүкэҕэ бары хаһаайыстыбаларга 167 тыһ. тахса таба баар буоллаҕына, быйыл – 172 тыһыынча.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата

Хаартыска: тустаах саайтан

Бэлэмнээтэ Женни Стрюкова

+1
0
+1
0
+1
0
+1
0
+1
0
+1
0
+1
0