COVID-19 ыарыы билигин даҕаны ситэри чинчийиллэ илик. Тоҕо сорох дьоҥҥо ыарыы сибикитэ суох ааһарын эбэтэр атыттар күүскэ ыалдьалларын учуонайдар өссө быһаарыах тустаахтар.
edersaas.ru
Бу ыарыы туһунан биир саамай дьикти сонуну олунньуга Ухань куорат быраастара быһаарбыттара. Ол курдук, кинилэр ыалдьыбыт дьон иһигэр табахсыттар ахсааннара быдан аҕыйах эбит диэн эппиттэрэ. Бастаан чинчийиллибит 140 ыарыһахтан икки эрэ киһи табахтыыр эбит, ол аата уопсай ахсаантан 1,4 % киһи.
Бу кэнниттэн, муус устарга ыарыы Европаҕа элбээбитигэр, бу көстүүнү аны Францияҕа бэлиэтээбиттэрэ. Луи Пастер аатынан институт учуонайдара коронавируһунан сутуллубут 500 киһиттэн 5 % эрэ бырыһыана табахсыттар эбит. Ол аата, табахтыыр дьон 80 % аҕыйахта ыалдьара көстүбүт. Франция чинчийээччилэрэ “Табахтааһын инфекцияттан көмүскүүр буолуон сөп” диэн дакылааттаабыттар.
Дакылаат улахан мөккүөрдээх ырытыыны көбүппүтэ, оттон Доруобуйа харыстабылын аан дойдутааҕы тэрилтэтин (ВОЗ) Кутталлаах ыарыылары кытта үлэҕэ салаатын баһылыга Мария Ван Керкхове маннык диэн эппитэ: “Табахтааһын коронавирустан көмүскээбэт, оттон ыалдьыбыт табахсыттар COVID-19 дьайыытыттан ордук күүскэ эмсэҕэлииллэр”.
Арассыыйа Доруобуйа харыстабылын министиэристибэтин бу боппуруоска эмиэ туох да саарбаҕа суох көрүүлээх — табах тыҥа ыарыыларыгар барытыгар куһаҕан эрэ дьайыыны оҥорор кыахтаах. Оттон табах коронавирустан көмүскүүрүн туһунан биир даҕаны наука дакаастабыла бүгүҥҥү күҥҥэ суох.
Роспотребнадзор саайтыгар табахсыттар короновирус ыарыы саамай ыарахан форматынан ыалдьаллара ордук элбэҕин туһунан суруйбуттар. Ону таһынан, табаҕы айахха угааһын ыарыыга хаптарыы биричиинэтин элбэтиэн сөбүн ыйаллар.
Егор Карпов, «Саха сирэ» хаһыат, edersaas.ru
Хаартыска — http://penzrb.ru