Наркология өрөспүүбүлүкэтээҕи диспансерын быраастара табахтан аккаастаныы аан дойдутааҕы күнүгэр аналлаах ааксыйаны 17 №-дээх оскуола үөрэнээччилэригэр ыыттылар.
edersaas.ru
Обургу саастаах оҕолор табаҕы тардыылара аныгы уопсастыба кыһалҕатынан буолар, онон бу боппуруоһунан туспа дьарыктаныы эрэйиллэр.
Бу күн 6,7,8 кылаас үөрэнээччилэрэ 5 былаһааккаҕа кытыннылар. Былаһааккаларга нарколог-психиатрдар, клиническэй психологтар аҥардас бэсиэдэнэн эрэ муҥурдаммакка, көрдөрөр-иһитиннэрэр матырыйааллары туһаннылар. Ону сэргэ «Биһиги чөл олоҕу талабыт» видеороликтар куонкурустарын түмүктэрин таһаардылар. 6 «а» кылаас -1, 7 «г» кылаас – 2, 8 «б» кылаас үһүс миэстэни ыллылар.
Наркология өрөспүүбүлүкэтээҕи диспансерын кылаабынай бырааһа Альбина Сивцева:
«Бу турар оҕолор бары дэҥҥэ көстөр талааннааххыт, эдэргит, олоххут иннигитигэр! Ол иһин, эһиги хаһан да сигаретаны илиигитигэр ылан көрбөккүтүгэр баҕарабын. Бу иэдээннээх дьаллык туох да үчүгэйгэ тириэрдибэт. Төттөрүтүн, эдэр организмы өлөрөр! Спордунан дьарыктаныҥ, ситиһиилээх уонна доруобай буолуҥ!» – диэн эҕэрдэ тылын эттэ.
“Куттал хоһо» диэн мусуой курдук оҥоһуллубут былаһаакканы биир да үөрэнээччи уонна учуутал быһа ааспатылар. Манна анатомия препараттара туруорулуннулар. Онон, оҕолор психоактивнай веществолар содулларын илэ харахтарынан көрдүлэр. Психиатрдар, наркологтар бу күн экскурсовод оруолун толордулар уонна оҕолор ыйытыктарыгар сиһилии хоруйдары биэрдилэр.
«Буортута суох үгэстэрдээх эйгэ» диэн иккис былаһааккаҕа клиническэй психологтар оонньуу көрүҥүнэн трениннэри ыыттылар. Кэрэхсэбиллээҕэ диэн, төрөппүттэр эмиэ кэлбиттэр уонна көхтөөхтүк кытыннылар.
«Оҕону куһаҕан кэмэлдьиттэн быыһыахха сөп. Кини ханнык баҕарар дьайыытыгар төрөппүттэр холобурдара улахан оруоллаах. Өскөтүн ийэ уонна аҕа табахтыыр буоллахтарына, табахтааһын буортутун итэҕэтэр ыарахан. Төрөппүттэр бэйэлэрэ чөл олоҕу көрдөрөр буоллахтарына эрэ, итэҕэтэр чэпчэки буолуо», – диэн диспансер клиническэй психолога Светлана Андросова санаатын үллэһиннэ.
Үһүс былаһааккаҕа нарколог-психиатр кыргыттары кэрэлиин дьүөрэлэһии эйгэтигэр ыалдьыттатта. Манна анаан ыҥырыллыбыт гример баҕалаах кыргыттарга тэҥнээн көрөр гириими оҥорон көрдөрдө. Ол эбэтэр, кыргыттар сирэйдэрин аҥарыгар табахтааһын кэнниттэн кэрэ аҥаар сирэйэ хайдах буоларын ойуулаан көрдөрдө.
«Кыыс оҕо саҥа олоҕу аҕалаары айыллан кэлэр, онон кини бэйэтин эрэ доруобуйатыгар буолбакка, оҕотун доруобуйатыгар кыһаллыахтаах», – диэн нарколог-психиатр Алена Константинова кыыс оҕо уонна сигарета хайдах да дьүөрэлэспэттэрин тоһоҕолоон бэлиэтээтэ.
Онтон спорт былаһааккатыгар оскуола оҕолоро бэйэлэрин ситиһиилэрин көрдөрдүлэр. Үтүө холобурдарынан чөл олоҕу тутуһуу ситиһиилэргэ эрэ буолбакка, үчүгэй түмүктэргэ тириэрдэрин итэҕэттилэр.
Ааксыйа кыттыылаахтарыгар барыларыгар сертификаттар, онтон кыайыылаахтарга сыаналаах бириистэр туттарылыннылар. Оскуола кэлэктиибэ наркология өрөспүүбүлүктээҕи диспансерын быраастарыгар махтаннылар.
Ольга Голикова, «Саха сирэ» хаһыат, edersaas.ru