Табаһыттар үлэлэрин-хамнастарын, кыһалҕаларын, араас боппуруостарын быһаарса олороллорго анаан, СӨ Тыатын хаһаайыстыбатын министиэристибэтэ «Ангара-1М» диэн холбонон кэпсэтэр 50 тэрили ылла.
Аҕыс оройуоҥҥа таба иитиитинэн дьарыктанар хаһаайыстыбалар маннык сибээһинэн туһаныахтара. Билиҥҥитэ үс тэрил аҕалыллыбыт. Онтон хаалбыттара 2021 сыл саҥатыгар кэлиэхтээхтэр диэн тустаах министиэристибэ саайтыгар суруллар.
Бу дьоҕус тэрил (ыстаансыйа) ураты күннээх-дьыллаах сиргэ судургутунан, анаан туруорар сири ирдээбэтинэн ордугун бэлиэтииллэр. 600 килэмиэтиргэ диэри хабар кыахтаах, эрэллээх төлөпүөн-телеграф сибээһэ буолар.
Маннык тэрили «Егоршинскай радиозавод» ААУо ылаллар.
СӨ Тыатын хаһаайыстыбатын миниистирин солбуйааччы Прокопий Николаев араадьыйа собуотугар сибээс систиэмэтин сүрүн конструкторын Курбан Исаевы кытары көрсүбүт. Икки өттүттэн салгыы бииргэ үлэлииргэ, Томпо оройуонугар табаһыттар хаһаайыстыбаларыгар бэрэбиэркэлээн көрүүнү барар саҥа «Ангара-1М» тэхиньиичэскэй хааччыйыытын туһунан кэпсэппиттэр.
Бэлиэтииллэринэн, Алдан, Булуҥ, Верхоянскай, Муома, Нерюнгри, Томпо, Өймөкөөн, Усуйаана оройуонун табаһыттара маннык тэрилинэн хааччыллыахтаахтар.
+1
+1
+1
+1
+1
+1
+1