Табаһыт оҕолор хамнас ааҕыстылар

Ааптар: 
Бөлөххө киир:

Быйыл сайын оскуола үөрэнээччилэрэ Кэбээйи улууһугар баар П.А.Кейметинов аатынан “Сэбээн” МУП табаны иитэр ыстаадатыгар, Максим Кейметинов “Олень” общинаҕа, өссө биир оҕо “Сэбээн  ТСО-ҕа үлэлээн, табаһыт уустук идэтин баһылаатылар. Уонна Сэбээн Күөл ыстаадаҕа үлэлээбит оҕолоро бүгүн хамнастарын ылан, үөрүү-көтүү бөҕө буолбуттар. Ол туһунан биһиэхэ “Сэбээн” МУП дириэктэрэ Людмила Бурцева иһитиннэрдэ.

— Быйыл “Кэбээйи улууһун (оройуонун)”  МТ Нэһилиэнньэ дьарыктаах буолуутун киинэ (сал. И.А.Васильева) “Сэбээн” МУП-ка үөрэнээччилэри үс ыйга дуогабарынан үлэлэтэргэ 10 кубуотаны көрбүтэ. Урукку сылларга биир ыйга эрэ биэрэр буоллахтарына, быйыл үс ыйга биэрэн олус абыраатылар. Маны мин таба хаһаайыстыбатын салайааччытын быһыытынан табаһыттарга улахан көмө курдук сыаналыыбын. Сайыҥҥы кэмҥэ табаны суукканы эргиччи маныахха, табалары мэччитиэххэ, көлөҕө анаан табалары үөрэтиэххэ эҥин наада. Саамай түбүктээх кэммитигэр үөрэнээччилэри биэрэн олус абыраатылар. Онон түгэнинэн туһанан биһиэхэ  үлэлээбит оҕолорбутугар олус махтанабыт. Ону тэҥэ кубуотаны биэрбитин иһин Ирина Анатольевна Васильеваҕа уонна хотугу төрүт дьарыкпытын өйүүр улууспут баһылыгар Иван Иванович Левиҥҥэ эмиэ истиҥ махталбытын тиэрдэбит, — диэтэ Людмила Васильевна.

Ити курдук, Евгений Никитин, Николай Кривошапкин, Игорь Захаров, Максим Кейметинов, Самира Кривошапкина, Маиза Варавина, Алексей Кривошапкин уо.д.а. ыстаадаҕа үлэлээн, төрүт үгэскэ уһуйулуннулар, төрөөбүт улуустарын тыатын хаһаайыстыбата сайдыытыгар төһүү буоллулар. Сибиэһэй салгыҥҥа сылдьан, төрөөбүт айылҕаларын кэрэтин көрөн, дуоһуйа сынньаннылар. Оҕолорго олохторугар умнуллубат түгэн буолан ааста. Кинилэр аны дириҥ билиини ылар туһугар сыралаһыахтара.

Бэлэмнээтэ: Женни Стрюкова

Хаартысканы: Л.В.Бурцева ыытта

+1
0
+1
0
+1
0
+1
0
+1
0
+1
0
+1
0