Арктика дьыаларыгар судаарыстыбаннай кэмитиэт кэлэр биэс сыл устата табаһыттарга 50 көһөрүллэ сылдьар дьиэни, таба мэччирэҥин маршруттарынан 50 дьиэни туттарарын туһунан иһитиннэрэр.
— Көһөрүллэ сылдьар дьиэлэр туундара табаһыттарыгар, оттон маршруттар базаларын дьиэлэрэ тайҕа зонатын табаһыттарыгар тутуллуохтара. Онуоха барыта 20 мөл. солк. көрүллүөҕэ, — диир Иннокентий Баланов. — Бастакы дьиэлэр оҥоһуллан, Арктика улуустарыгар тургууга сылдьаллар. Бу дьиэлэр тымныыны уонна тыалы аһардыбат матырыйаалынан оҥоһулуннулар, дөбөҥнүк, ол эбэтэр сүүрбэ мүнүүтэ иһинэн хомуллаллар-ыһыллаллар, ыйааһыннара чэпчэки, онон көһөрөн илдьэ сылдьарга бэрт табыгастаахтар.
Арктика дьыаларыгар судаарыстыбаннай кэмитиэт чахчытынан, табаны иитиигэ идэтийэр араас киэп бас билиилээх 106 хаһаайыстыбаҕа 1792 киһи үлэлии-хамсыы сылдьар. Салааны сайыннарыыга, ол эбэтэр үлэ төлөбүрүн сорох чааһын толуйууга, базаны хаҥатыыга уо.д.а. быйылгы сылга 1 млрд. кэриҥэ харчы көрүллүбүт. Кэлэр биэс сылга таба ахсаанын 154 тыһыынчаттан 200 тыһыынчаҕа диэри тиэрдэр сорук турар.
Раиса Сибирякова, “Саха сирэ” хаһыат, edersaas.ru.