СӨ уус-уран оҥоһугун маастара Зинаида Григорьева Алдан оройуонун Угоян нэһилиэгиттэн сылдьар. Айар куттаах иистэнньэҥ оройуон маастардарын дэлэгээссийэтигэр киирсэн, быйылгы «Якутия мастеровая» быыстапкаҕа аан бастаан кыттар.
Зинаида Григорьева эбэҥки омугун кумалаанын (истиэнэ көбүөрэ) тигиинэн дьарыктанар эбит. «Таба тириитэ кэмчи буолан, убаһа тириитин кытта кыбытан тигэбин», — диэн бэлиэтиир маастар.
Кэлиҥҥи сылларга тыатааҕы табаны тардар буолан, таба ахсаана биллэ аҕыйаабыт. Онон таба тириитин туһаҕа таһаарар иистэнньэҥнэр матырыйаалларын булууга уустуктары көрсөллөр эбит.
Зинаида Григорьева «Якутия мастеровая» быыстапкаҕа кыттыы олус туһалааҕын бэлиэтиир. Таба тириититтэн тикпит көбүөрдэрин саха балаҕаннаах дьоҥҥо атыылыыр былааннаах. Биллэн турар, илиинэн тигии буолан хаачыстыбата — оһуобай!
Быйылгы быыстапка урукку сыллардааҕар ураты. Киһи аҕыйах буолан, көрөргө-истэргэ да холку, ис хоһооно да дириҥ, киһини сэргэхситэр эрэ буолбатах, толкуйдатар, сырдыкка-кэрэҕэ угуйар.
Елена ПОТОЦКАЯ, «Саха сирэ» хаһыат