Олоххо маннык эмиэ буолар эбит — атыылыы сатаан баран уоруу. Биллэн турар, ити төрүөт холуобунай эппиэтинэстэн босхолообот.
Дьокуускай куорат полициятын 1 №-дээх отделыгар 6500 солк. сыаналаах суотабай төлөпүөнүн уордарбыт киһи сайабылыанньа суруйбут. Бу киһи массыына саппаас чаастарын атыылыыр маҕаһыыҥҥа үлэлиир эбит, онно уордарбыт.
Бу уорууга уорбаланааччыны оперативниктар түргэнник туппуттар — Кэбээйи улууһуттан төрүттээх, урут сууттана сылдьыбыт 31 саастаах киһини.
Уорбаланааччы быһаарбытынан, кини ити күн таба тириилэрин атыылаары, маҕаһыын бөҕөтүн кэрийбит да, ким да ылыан баҕарбатах.
Онтон испииһэгэр бүтэһигинэн сылдьар маҕаһыыҥҥа, ити массыына саппаас чаастарын атыылыыр маҕаһыыҥҥа, киирэн батаран көрбүт. Эргэ, дэлби имиллибит, куһаҕан көстүүлээх табаары бу да сырыыга ким да атыылаһыан баҕарбатах. Ол иһин кыһыытыгар, дьон элбээбит, атыылааччы аралдьыйбыт кэмигэр, прилавокка сытар суотабай төлөпүөнү ылан тахсыбыт.
Кини кыһыйбыта-абарбыта суолтата суох, сүрүнэ — атын киһи тус малын уордаҕа, онон, киниэхэ «уоруу» ыстатыйанан холуобунай дьыала тэриллибит. Бу туһунан СӨ ИДьМ-тын пресс-сулууспата иһитиннэрдэ.
РФ Холуобунай кодексатын 158-с ыст. 2-с чааһынан көрүллэр накаастабыл миэрэ — 5 сылга диэри болдьоххо көҥүлү быһыы.
Биһиги корр., «Саха сирэ» хаһыат, edersaas.ru
Хаартыска: интэриниэттэн.