Таба иитиитинэн Тыа хаһаайыстыбатын министиэристибэтэ дьарыктаныаҕа
Саҥа дьыл эрэ иннинэ Айсен Николаев тыа хаһаайыстыбатын миниистирин солбуйааччынан Прокопий Николаевы аныыр туһунан ыйаахха илии баттаабыта.
edersaas.ru
Биллэрин курдук, үүммүт сылтан Арктика уонна хотугу омуктар дьыалаларыгар туспа министиэристибэ тэрилиннэ. Кини өрөспүүбүлүкэ Арктикатааҕы эҥээрин кэлим сайыннарыы уонна хотугу төрүт олохтоох аҕыйах ахсааннаах омуктар бигэтик сайдыыларын боппуруостарынан дьарыктаныаҕа. Оттон бу иннинэ Арктика дьыалаларыгар судаарыстыбаннай кэмитиэт дьарыктаммыт сорох салаалара (табаны иитии, бултааһын, килиэккэлээх кыылы иитии) Тыа хаһаайыстыбатын министиэристибэтигэр бэрилиннэ. Онон, бу биэдэмистибэни салайбыт Прокопий Николаев тыа хаһаайыстыбатын миниистирин солбуйааччынан анаммыта кими даҕаны соһуппата.
— Уопуттаах кэлэктиипкэ кэлбиппиттэн үөрэбин, министиэристибэ үлэһиттэрин үгүскүтүн билэбин. Иннибитигэр дьоһун сорук турар: таба салаатын табаарынай таһымҥа таһаарыахтаахпыт, — диэбитэ Прокопий Николаев тохсунньу 9 күнүгэр бастакы вице-премьер Алексей Колодезников министиэристибэҕэ кинини билиһиннэрбитигэр.
Ыспыраапка:
Прокопий Романович Николаев 1967 с. Өлөөҥҥө төрөөбүтэ. 1990 с. Иркутскайдааҕы тыа хаһаайыстыбатын институтун, 2006 с. РФ Президенин иһинэн госсулууспа академиятын бүтэрбитэ. Дойдутугар сопхуоска, дьаһалтаҕа, 2003-2013 сс. Өлөөн улууһун баһылыгынан, 2013-2017 сс. «Дьокуускайдааҕы көтөр фабриката» ААУо генеральнай дириэктэринэн, 2017-2018 сс. Арктика дьыалаларыгар судаарыстыбаннай кэмитиэт бэрэссэдээтэлинэн таһаарыылаахтык үлэлээбитэ.
Раиса Сибирякова, «Саха сирэ» хаһыат, edersaas.ru