Саха Өрөспүүбүлүкэтин Арктика дьыалаларыгар судаарыстыбаннай кэмитиэтин бэрэссэдээтэлэ Алексей Киселев бүгүн буолбут брифинигэр суруналыыстарга Хотугу сир үгэс буолбут салааларын судаарыстыба өттүттэн өйөөһүн дьаһалларын, ону сэргэ хоту улуустар тирээн турар кыһалҕаларын билиһиннэрдэ.
Роман Попов, “Саха сирэ” хаһыат, https://edersaas.ru
Алексей Васильевич 2016 сыллаахха хоту улуустарга өтөрүнэн буолбатах, нуорматтан хадьайар күһүн кэлэн ааспытын эттэ. Онно миэтэрэттэн ордук халыҥнаах хаар түспүтүн, ону даҕаһыннаран ахсынньы 7-гэр ардаабытын санатта. Бэл аарыма кырдьаҕастар манныгы өйдөөбөттөр диэтэ. Өскөтө ыарахан дьыл содула ынах, сылгы кыстыгар тута биллэр буоллаҕына, айылҕа уларыйыыларыгар тулуйумтуо таба кыылга охсуута, исписэлиистэр этэллэринэн, бу олунньуттан ыла биллэн барыа үһү.
Аны туран, бары истэ-билэ сылдьаргыт курдук, эмиэ күн-дьыл усулуобуйатыттан сэдиптээн, хоту улуустарга кыһыҥҥы суолунан сылдьыһыы быйыл олус уустугурда. Билиҥҥитэ Аллараа Халымаҕа, Орто Халымаҕа диэри суол оҥоһулла илик. Абый улууһугар тиэрдэр суол субу-субу тааҥнаан айаны-сырыыны атахтыыр. Онон сүөһү аһылыгын, ол иһигэр табаҕа эбии аһылык буолар комбикорму, тууһу тиэрдии олус уустук быһыыга-майгыга барарын бэлиэтээтэ.
Алексей Васильевич иккис сүрүн кыһалҕанан толоруллар үлэни толору кээмэйинэн үбүлээһин кыайтарбата буоларын ыйда, итиннэ баар балаһыанньаны билэбит, хонтуруолга тутабыт диэтэ.
Роман Попов, “Саха сирэ” хаһыат, https://edersaas.ru