Табаҕа хаайыытыгар бобуулаах маллары массыынанан киллэрбиттэр

Холуонньаларга буруйдарын боруостаан олорооччуларга бобуулааҕы — суотабай төлөпүөнү, итирдэр утаҕы, наркотигы, харчыны, уо.д.а. сокуонунан көҥүллэммэт маллары — киллэрэ сатааһын өссө биир чахчыта таҕыста. Маннык маллары бэрэбиэркэлээһин мэлдьи ыытыллар. 

Вера МАКАРОВА, «Саха сирэ» хаһыат, https://edersaas.ru/  

Ол курдук, Табаҕа бөһүөлэгэр баар 7 №-дээх кытаанах эрэсиимнээх холуонньаҕа бу хаайыы уонна управление сотрудниктара былааннамматах оннук бэрэбиэркэни ыыттылар. Кинилэргэ киирбит иһитиннэриини бэрэбиэркэлээһин түмүгэр, бу холуонньа промышленнай зонатыгар тутуу матырыйаалларын киллэрэр таһаҕас массыынатын тохтоттулар.

Хонтуруоллуур-аһардар пууҥҥа массыынаҕа толору тиэллибит кумахха кистэммит бобуулаах маллары булар кыаллыбатах.

Ол эрэн, салгыы хонтуруоллаан, холуонньа биир помещениетыгар кистэлэҥ сири булан ылбыттар. Мантан массыынанан киллэрбит маллары барытын — 30 суотабай төлөпүөнү, 15 гарнитуру, 13 ииттэрэр тэрили, 6 USB-кабели итиэннэ 10 л испиирдээх утаҕы кытары 950 гр доруоһаны туппуттар.

Бу чахчынан билигин сулууспанан бэрэбиэркэ ыытылларын туһунан РФ Накаастабылы толорор федеральнай сулууспатын Саха сиринээҕи управлениетын пресс-сулууспата иһитиннэрдэ.

Вера МАКАРОВА, «Саха сирэ» хаһыат, https://edersaas.ru/  

Хаартыска: УФСИН пресс-сулууспата.