Куорат таһынааҕы Табаҕа сэлиэнньэтигэр чугастааҕы сылларга бөдөҥ эбийиэктэри тутуу торумнанна. Уонна бу Өлүөнэни туоратар муоста эрэ буолбакка, ыраастыыр канализацияны, оҕуруот аһын харайар сири тутуу. 2022-2024 сылларга Строительнай уулуссаҕа 360 миэстэлээх саҥа оскуола дьэндэйиэҕэ.
Бу туһунан Дьокуускай куорат баһылыга Евгений Григорьев Эргэ уонна Саҥа Табаҕа олохтоохторун кытта көрсүһүүгэ эттэ. Көрсүһүү иллэрээ күн “Дьокуускай куорат” куорат уокуругун сайдыытын стратегиятын дьүүллэһии чэрчитинэн барда.
Евгений Григорьев куораты сайыннарыыга туһуламмыт өрөспүүбүлүкэ Ил Дарханын Ыйааҕын олоххо киллэриигэ үлэ ыытылларын бэлиэтээтэ.
Дьокуускай баһылыга олохтоохторго Табаҕаҕа туох үлэ ыытыллыбытын уонна сэлиэнньэ сайдыытын былаанынан туох ыытыллыахтааҕын сиһилии кэпсээтэ. Ол курдук, быйыл элбэх оҕолоох ыаллар сир учаастактарыгар 2,5 км тахса тиийэр суолу тутуу түмүктэниэҕэ. Сквердэри тупсараллар, воркаут-зоналаах баскетбол былаһаакката тутуллар.
“2023 сылга Покровскай тракт 25 килэмиэтириттэн Эргэ Табаҕаҕа киириигэ уулуссаны саҥардыахпыт, бу уопсайа 2,348 км. “Умнас” массыына суолуттан Өлүөнэ муостатыгар диэри суол учаастагын саҥардыы үлэтин бэлэмнэниитэ ыытыллыаҕа”, — диэтэ куорат баһылыга.
2023 сылга Табаҕаҕа Каландаришвили, Комсомольская уонна Лесная уулуссалары өрөмүөннүөхтэрэ.
Дьокуускай баһылыга пассажирдарга табыгастаах буоларын курдук тырааныспар маршруттара уларытыллыахтара диэтэ.
Сэлиэнньэҕэ сылы эргиччи үлэлиир успуорт эбийиэгин тутуу туһунан ыйытыыга хоруйдууругар, Евгений Григорьев чэпчэки конструкциялартан түргэнник таҥыллар аркалыы көрүҥнээх успуорт саалатын тутарга этии киллэрдэ.
Уу ылар сиригэр дьиэ туттубут дьон бас билиигэ бырааптарын толотторууну туоһуластылар. Баһылык бэлиэтээбитинэн, бу “Дьокуускай куорат” бүттүүнүн кыһалҕата, киин куорат сиригэр 8 тыһыынча 970 сир учаастага уу ылар сиригэр түбэспит.
“Маны быһаарыыга кытылы бөҕөргөтөр тутууну ыытыы буолуохтаах. Бу хайысхаҕа күүскэ үлэлиибит, чуолаан, Табаҕа сэлиэнньэтигэр биэрэги бөҕөргөтөр үлэни ыытыахпыт. Маны сэргэ федеральнай таһымҥа бырайыак-смета докумуонун хаттаан көрөргө туруорсабыт”, — диэтэ Евгений Григорьев.
Көрсүһүү түмүгэр олохтоохтор баһылыкка махтаннылар. Табаҕа тэтимнээхтик сайдарыттан астыналларын биллэрдилэр: суол аспаалланар, саҥа социальнай эбийиэктэр – Култуура дьиэтэ уонна балыыһа тутулуннулар. “Норуот бүддьүөтэ” уонна “Олохтоох көҕүлээһиннэри өйүүр бырагыраама” чэрчитинэн үгүс бырайыак олоххо киирэр.
Дьокуускай куорат уокуруктааҕы дьаһалтатын сонуннары киэҥник тарҕатар ситимнэри уонна уопсастыбаннаһы кытта сибээскэ департамена
Бэлэмнээтэ Женни Стрюкова
Хаартыска: Департамент түһэриитэ