Бүгүн, атырдьах ыйын 9 күнүгэр Айсен Николаев Табаһыт күнүн олохтуур туһунан ыйааҕы таһаарда!
edersaas.ru
Табаһыттар — айылҕа ураты экстремальнай усулуобуйатыгар көһө сылдьан, үлэлиир-хамсыыр дьоннор. Дойду уопсастыбаннай пограничниктара, уопсастыбаннай экологтар, ирбэт тоҥу араҥаччылаачылар. Сир ийэ ирбэт тоҥун харыстаан-араҥаччылаан сытар туундарата уонна ойуур былаастаах туундарата суох табаны иитии бигэтик сайдыбат.
Өрөспүүбүлүкэ парламена бу сыллар усталарыгар «Саха Өрөспүүбүлүкэтигэр таба иитиитин туһунан», «Саха Өрөспүүбүлүкэтигэр көс ыал туһунан», «Саха Өрөспүүбүлүкэтигэр көс оскуола туһунан», «Саха Өрөспүүбүлүкэтин төрүт олохтоох, аҕыйах ахсааннаах, көс омуктарын туһунан», «Саха Өрөспүүбүлүкэтигэр көс дьиэ туһунан» сокуоннары таһаарда.
2013 сыллаахха Халарча туундаратын табаһыттарын мунньаҕын быһаарыытынан, Бырабыыталыстыбаҕа уонна Ил Түмэҥҥэ табаһыттар хамнастарын үрдэтэргэ туруорсуу оҥоһуллубута, оччолорго кинилэр 8 000 солк. хамнастаахтара. Билигин хамнас тиийинэн олоруу алын таһымыгар тэҥнэстэ, сыл уонна кыбаартал түмүктэринэн тустаах улуус итиэннэ хаһаайыстыба эбии төлөбүрү оҥороллор. Элбэх табалаах, үрдүк көрдөрүүлээх Анаабыр уонна Өлөөн улуустарыгар табаһыт хамнаһа ортотунан 50-60 тыһыынча солкуобайга тиийдэ.
Таба – ытык кыыл. Таба төрүт олохтоох хотугу омуктары араҥаччылыыр. Таба биһиги төрүт үгэспит, олохпут-дьаһахпыт илгэтэ. Таба — биһиги тыыммыт, куппут-сүрбүт, итэҕэлбит! Табаны иитии – төрүт олохтох омуктар тирэхпит, сүрүммүт! Табаһыт күнэ биһиги өссө күүскэ сомоҕолоһорбутун, өссө үрдүк эппиэтинэстээхтик табаны иитии боппуруостарынан дьарыктанарбытын ирдиир.
Айсен Сергеевич Табаһыт күнүн олохтоон, сүҥкэн үөрүүнү тосхойбутугар махтал! Норуот суруйааччыта, хотугу омуктар тумус киһибит Андрей Кривошапкин: «Таба баар буолуо – эбэҥки баар буолуо, таба эстиэ – эбэҥки эстиэ», — диэн кынаттаах тыллары эппитэ. Бу тыллар сытыытык тураллар!
Олох салҕанар! Туундара Эбэ хотун киэҥ киэлитинэн, киэҥ тайҕа устунан сүүһүнэн тыһыынча таба үөрэ тамайа көттүн, оҕо аймах дьоллоох саҥата чаҕаардын, һээдьэ уонна лоһурдьа өссө күүскэ дуораһыйдыннар! Саха сирэ, иннибит диэки!
Елена Голомарева,
IV,V,VI ыҥырыылаах Ил Түмэн дьокутаата.