Тааттаҕа быйылгы ыһыах саха сэбиэскэй литературатын төрүттээбит суруйааччы, уһулуччулаах бэлитиичэскэй диэйэтэл, төлөннөөх революционер Былатыан Ойуунускай төрөөбүтэ 125 сылыгар ананар. Бу долгутуулаах бэлиэ ыһыаҕы көрсөргө олохтоохтор өрө көтөҕүллэн күүстээхтик бэлэмнэнэллэр. Улуустааҕы култуура уонна духуобунай сайдыы управлениетын начаалынньыга Гаврил Вырдылин:
— Ыһыахпыт бэс ыйын 15-17 күннэригэр ыытыллар. Бастакы күн Ойуунускай төрөөбүт сиригэр-уотугар Чөркөөххө, иккис, үһүс күннэр Ытык Күөлгэ Хадаайы сыһыытыгар буолуохтара. Бу үөрүүлээх, долгутуулаах үрүҥ тунах ыһыахпытын көрсө бэлэмнэниибит тиһиктээхтик салҕанар. Ол курдук, бастатан туран, Тааттаҕа киирэр кыраныыссаны өрө тардыы үлэтэ буолла. Манна Дьокуускайтан биир дойдулаахпыт, РФ, СӨ доруобуйаҕа харыстабылын туйгуна, СӨ үтүөлээх бырааһа, медицинэ наукатын дуоктара Егор Егорович Борисов кэлэн кыттыыны ылан дойдулаахтарын улаханнык сэргэхситтэ, үөртэ. Кини салалтатынан улуустааҕы култуура уонна духуобунай сайдыы управлениетын, Чөркөөх, Тыараһа нэһилиэктэрин эр дьоно хомуллан тахсан, ыалдьыттар, айан дьоно тохтоон, сынньанан ааһар кыраныыссаларыгар субуотунньуктаатылар. Хомуйан, ыраастаан, кырааскалаан сэргэхситтилэр, — диэн кэпсээтэ.
Биһиги корр., «Саха сирэ» хаһыат, edersaas.ru