Бу күннэргэ Таатта улууһугар Олоҥхо күнүгэр аналлаах сонун, интэриэһинэй тэрээһиннэр ыытылыннылар. «Кустук» оҕо драматическай образцовай тыйаатырын төрүттээччи, СӨ култууратын туйгуна Матрена Вырдылина сырдык кэриэһигэр аналлаах оҕо драматическай кэлэктииптэрин өрөспүүбүлүкэтээҕи көрүү-фестивала ыытылынна.
Анивера Акимова, «Саха сирэ» хаһыат, https://edersaas.ru/
Тэрээһиҥҥэ Мэҥэ Хаҥалас, Амма, Таатта талааннаах оҕолоро «Бэйэтэ эмтиэкэ» , «Нууччатымсыйбыт», «Хараҥаҕа тыкпыт сырдык», «Ийэ сүрэҕэ» , «Абаҕа сулустара» испэктээктэри көрдөрдүлэр.
Аны биир күн Ытык Күөл уулуссаларыгар араадьыйанан олоҥхону иһитиннэрэннэр, бар дьон сүргэтэ көтөҕүлүннэ. Өссө сорох тэрилтэлэрэ олоҥхоһуттар бэйэлэрэ кэлэннэр ыалдьыттаатылар. Эмиэ бу күннэргэ Ытык Күөлгэ ыытыллыбыт «Олоҥхо педагогикатын технологията СЭДИП» диэн быыстапка дьон сэҥээриитин ылла.
«СЭДИП – оҕо, ыччат күннээҕи олоҕун сэдиптииргэ, былаанныырга, инники кэскилин ыраланарга, олоххо киллэрэргэ үөрэнэр педагогикатын технологията. Оҕоҕо олоҥхону робототехника ньымаларынан сайыннарыыга В.В. Васильев, К.Г. Чемпосова «Олоҥхо Дойдута” ааптарыскай бырайыактары оҕолор биһирээтилэр. Уус Тааттатааҕы “Харыйачаан” уһуйаан иитээччилэрэ оҕолору Олоҥхо муударастарыгар робототехника ньымаларынан уһуйар эбиттэр» , – диэн дьаһалта исписэлииһэ Анна Яковлева быһааран этэр.
Анивера Акимова, «Саха сирэ» хаһыат, https://edersaas.ru/