Бу күннэргэ Москваҕа тохсунньу 27 күнүттэн олунньу 5 күнүгэр диэри Көстүүнэй тиэргэҥҥэ (Гостиный двор) 2-с Арассыыйатааҕы «Ураты Арассыыйа (Уникальная Россия)» уус-уран быыстапка-пуорума буола турар.
Манна Таатта улууһун дэлэгээссийэтэ анаан оҥостон тиийэн кытта сылдьар.
— Биһиги дойду тэбэр сүрэҕэр Москваҕа, уонна дойду киин куоратыгар Санкт-Петербурга сырыыбыт Арассыыйа норуоттарын култуураҕа мунньуллубут баайын-дуолун сылыгар, Саха сирэ Арассыыйа састаабыгар киирбитэ — 390, Саха АССР төрүттэммитэ — 100, Таатта улууһа төрүттэммитэ — 110, саха литэрэтиирэтин төрүттээччи, бөлүһүөк Алексей Кулаковскай-Өксөкүлээх Өлөксөй төрөөбүтэ — 145, Саха АССР култууратын үтүөлээх үлэһитэ Лука Турнин төрөөбүтэ 105 сылларыгар ананар. Таатта улууһуттан бу суолталаах тэрээһиҥҥэ уонча норуот маастара уус кыттыыны ыла сылдьар уонна 42 иистэнньэҥ уонна уус дьон бэйэлэрин үлэлэрин көрдөрө уонна атыыга ыыттылар.
Олунньу 2 күнүгэр «Үгэс кыһыл көмүһэ (Золото традиции)» диэн быыстапка кыттааччыларын айар кэнсиэрэ буолуоҕа. Онно биһиги улууспут дэлэгэссиийэтэ кыттыаҕа.
Маны таһынан, СӨ култууратын үтүөлээх үлэһитэ, саха хомуһун аҕалаатар аҕата Лука Турнин 105 сылыгар анаан Москваҕа кини сылдьыбыт сирдэринэн хомуһунан дьүһүйэн оонньуохпут. Алексей Кулаковскай-Өксөкүлээх Өлөксөй 145 сылынан кини көмүс уҥуоҕар сибэкки дьөрбөтүн ууран кэриэстиэхпит.
Бэҕэһээ Санкт-Петербург куоракка тиийэн, биир дойдулаахтарбытын көрсөн кэллибит. Онно туризм тиэмэтигэр бииргэ үлэлээһини торумнаатыбыт. Биир дойдулаахпыт Борис Неустроев-Мандар Уус Арассыыйатааҕы этнографическай мусуойга бэйэтин кинигэтин ыыппыта.
Ол ону туттардыбыт. 1913 сыллаахха Санкт-Петербург куоракка «Бродячая собака» диэн ааттаах «подвал-арткафе» диэн баар эбит. Онно Василий Никифоров-Күлүмнүүр биир дойдулаахпыт Дьохсоҕонтон төрүттээх Мария Николаева «Манчаары» пьесатын тылбаастаан аахпыта биллэр. Онно сылдьан Манчаары оонньууларын көрсө Манчаары пьесатын айыллыбыт устуоруйатын кэпсээтибит, видео-матырыйаал уһуллубут, — диэн Тааттатааҕы Норуот айымньытын дьиэтин салайааччыта Гаврил Вырдылин кэпсээтэ.
Елена ПОТОЦКАЯ, “Саха сирэ” хаһыат, edersaas.ru
Хаартыска — Гаврил Вырдылин тиксэриитэ.