Тааттаҕа олунньу 28-кулун тутар 2 күннэригэр Былатыан Ойуунускай төрөөбүтэ 125 үбүлүөйдээх сылын чэрчитинэн, үс күн устата «Дьулуруйар Ньургун Боотур» олоҥхо тоҕус ырыатын нэһилиэктэринэн толоруу күрэһэ ыытылынна.
— Олоҥхону истиигэ эйгэ тэриллэр, ол курдук, «Ойуунускай уонна олоҥхо» кинигэ быыстапката, нэһилиэктэр олоҥхоҕо үлэлэрин сырдатыылара, оҕолор олоҥхону истэ-истэ, уруһуйга түһэриилэрэ, сахалыы ас-үөл быыстапката ыытылынна. Хаартыскаҕа түһүү зоната тэрилиннэ. Бастакы күн дьүүллүүр сүбэ ырытыытынан түмүктэннэ. Истибиттэр да, кыттыбыттар да, оҕолор да, бары астынан тарҕастылар. Ити курдук, улууска Ойуунускай үбүлүөйдээх тэрээһиннэрэ саҕаланнылар, — диэтэ Таатта улууһунааҕы Олоҥхо ассоциациятын салайааччы, улуус баһылыгын солбуйааччы Изабелла Сивцева.
Оттон Хартыына галереятыгар «Таатта оҕото Дьаралыктыйа Былатыан тойуга» — уруһуйдуур дьоҕурдаах оҕолорго уонна улахан дьоҥҥо «Дьулуруйар Ньургун Боотур» олоҥхону тута истэн уруһуйдуур интегрированнай дьарыктар ыытылыннылар.
Татьяна МАРКОВА, «Саха сирэ» хаһыат, edersaas.ru.
