Балаҕан ыйын 2 күнүнээҕи туругунан, өрөспүүбүлүкэ үрдүнэн, бас билии көрүҥүттэн тутулуга суох, 419 тыһыынча 225 туонна от оттонно, эбэтэр сыл тахсар оппут 88 %-на соҕотуопкаланна.
edersaas.ru
Былырыын баччаларга 392 тыһ. 460 туонна от соҕотуопкаламмытын кытары тэҥнээтэххэ, көрдөрүү куһаҕана суох. Ол курдук, Таатта улууһа 38 071 туонна оту чөкөтөн, былаанын 101% толордо. Атын улуустары ыллахха, Мэҥэ Хаҥалас 36 381, Чурапчы 36 118, Сунтаар 32 366, Ньурба 30 891, Хаҥалас 27 629, Амма 26 191, Нам 26 168, Бүлүү 25 784, Үөһээ Бүлүү 22 948, Өлүөхүмэ 16 735, Кэбээйи 15 421, Горнай 12 396 туоннаны оттоотулар.
Сүөһү сүмэһиннээх аһылыгын бэлэмнээһин кыраапык быһыытынан баран иһэр: 5 501 туонна сиилэс угулунна. Ол иһигэр сунтаардар 2 тыһ., мирнэйдэр 1 тыһ. 118, хаҥаластар 1 тыһ., ньурбалар 540, бүлүүлэр 250, чурапчылар 200, мэҥэ хаҥаластар 150, аммалар 75 туонна сиилэһи уктулар. Маны таһынан, 2 тыһ. 234 туонна сенаж бэлэмнэммититтэн саамай элбэҕи Хаҥалас (500 туонна), Таатта (480 туонна) уонна Уус Алдан (320) оҥордулар.
Дьааҥы улууһун хаһаайыстыбалара 6081 туоннаны соҕотуопкалаан, кыстыыр отторун 55 %-ын хааччыннылар, ол иһигэр 560 туоннаны ыраах учаастактарга тиийэн үлэлээбит 12 мобильнай биригээдэ оттоото. Тыа хаһаайыстабытын управлениетын чахчытынан, улууска 8537 туонна от тиийбэт. Билиҥҥи туругунан, Таатта улууһуттан 400 , Томпоттон 300 туонна оту атыылаһар туһунан кэпсэтии бара сылдьар. Отторо тиийбэт туруктах атын да улуустар хаһаайыстыбалара барыллааһын сайаапкаларын оҥорон эрэллэр.
Саас бурдук 7 991 гектарга ыһыллыбытыттан, кураантан тэптэрэн, 259 гектар үүммэтэ, 642 гектар бурдуга оттуу хомулунна, инньэ гынан 7 тыһ. гектар бурдуга быһыллар буолла. Билиҥҥи туругунан, 1498 гектар бааһына бурдуга хомулунна.
Раиса Сибирякова, «Саха сирэ» хаһыат, edersaas.ru