Олунньу 17 күнүгэр Владимир Аржаков салайааччылаах Таатта улууһуттан төрүттээх Дьокуускай олохтоохторун түмсүүтэ куорат баһылыгын эбээһинэһин толорооччу Евгений Григорьевтыын көрүстэ.
Кинилэр куорат мэрин быыбарыгар туруохтаах кандидаты кытта көрсүһүүнү бастакынан тэрийбит улуус түмсүүтэ буолла. Көрсүһүүгэ Таатта улууһуттан төрүттээх биллэр-көстөр дьон, урбаанньыттар, общественниктар, култуура үлэһиттэрэ отучча киһи буолан мустан, куорат сайдыыта ханнык хайысханан барыахтааҕын туһунан санааларын үллэһиннилэр.
Куоракка олорор Таатта улууһун урбаанньыттарын түмсүүтүн салайааччыта, “Дархан уус” быыстапканы тэрийээччи Акимов Николай Иннокентьевич: “Куорат салалтата урбаанынан, илии оҥоһугунан дьарыктанар дьону кытта ыкса сибээстээх үлэни ыытара оруннаах буолуо этэ”, — диэн тус санаатын үллэһиннэ. Тимир уустарын аатырбыт быыстапкалара “Дархан Уус” хайдах уустары түмэрин, үлэтин ыытарын туһунан билиһиннэрдэ.
Түмсүбүт дьон куорат олоҕор сыһыаннаах кыһалҕалары ыйдылар, туох уларыйыы ирдэнэрин кэпсээтилэр. Холобур, куорат кыра уонна орто эргиэнинэн дьарыктанар тэрилтэлэрин кэнники кэмҥэ ааҥнаабыт баараҕай үптээх сетевой маҕаһыыннарыттан (чуолаан аптекалары) көмүскээһин, улуустары кытта үлэлэһии, төрүт итэҕэли сайыннарыы туһунан этиилэр киирдилэр.
Саха сирин биллэр артыыһа Иннокентий Луковцев чеченннэр киин куораттарыгар Грознайга бара сылдьан сөхпүт, ымсыырбыт холобурун туһунан кэпсээтэ. “Куораттарын уулуссалара олоччу чечен омук ытыктыыр, бэйэлэрин сирдэриттэн төрүттээх дьоннорун аатынан ааттаммыт. Дьокуускайга элбэх уулусса манна хаһан да кэлэ да сылдьыбатах, эбэтэр саарбах өҥөлөөх дьон ааттарын сүгэллэр. Ити Поярков, Лермонтов уулуссаларын оннугар бэйэбит ытыктыыр дьоммут ааттара бэриллэллэрэ буоллар, оруннаах даҕаны, үөрүүлээх да буолуо этэ”, — диэн санаатын эттэ.
Олонхо театрын салайаччыта Виталий Власов саха тылын, итэҕэлин сайыннарыы туһунан толкуйун үллэһиннэ, бэйиэт Гаврил Андросов: “Куорат сахата”, — диэн бигэ өйдөбүл баар буолуохтааҕын эттэ.
«Ытык Күөл» уопсастыбаннай тэрилтэ бэрэссэдээтэлэ Альберт Соров Евгений Григорьевы устудьуон эрдэҕиттэн билэрин туһунан кэпсээтэ, үчүгэй спортсмен, саталлаах салайааччы буолара оччолортон көстөр этэ диэн кэпсээн баран, биир дойдулаахтарын кинини өйүүллэригэр ыҥырда.
Түмсүү кыттыылаахтара көрсүһүүгэ Дьокуускай куорат 203-с оройуонугар баар смарт библиотекаҕа саха биллэр суруйааччытын, биир дойдулаахтарын Николай Денисович Неустроев аатын иҥэрэри туруорустулар. Былырыын өрөспүүбүлүкэҕэ драматург төрөөбүтэ 125 сааһын бэлиэтээбиттэрэ.
Таатта улууһун түмсүүтэ быыбарга Евгений Григорьевы өйүүр туһунан быһаарыныы ылынна. Атын улуустар түмсүүлэрэ куорат кэскиллээх салайааччытын эмиэ өйүөхтэрэ диэн эрэллэрин биллэрэн туран, таатталар көрсүһүүнү үс төгүллээх “Уруй!” эҕэрдэнэн түмүктээтилэр.
Сандал Иванов