Таатта улууһун Туора Күөл нэһилиэгэр Иван Николаевич Гуляев сырдык кэриэһигэр волейболга күрэхтэһии буолан ааста.
Бу иккис сылын ыытыллар, номнуо үтүө үгэскэ кубулуйан эрэр, волейбол оонньууну таптааччылары түмэр түһүлгэ буолан эрэр тэрээһин. Иван Николаевич Гуляев успуорду өрө тутар физкултуура учууталынан, кэлин оскуола дириэктэринэн таһаарылаахтык үлэлээбитэ. Тэрээһин туһунан кини кэргэнэ, Туора Күөл орто оскуолатын математикаҕа учуутала Ульяна Ивановна Гуляева санаатын үллэһиннэ:
— Аҕабыт сырдык аатын үйэтитэр волейбол күрэһэ бүтүн өрөспүүбүлүкэ таһымнаах ааста диэм этэ. Уопсайа 12 хамаанда кэлэн көхтөөхтүк кытынна. Манна аҕам саастаах оонньооччулар кэлэн дуоһуйа сынньаннылар, эдэр саастарын санаан күөрэйэр мээчиги сиргэ түһэрбэккэ үөһээ көтүттүлэр. Былырыын пандемиянан тэрээһиммит ыытыллыбатаҕа. Аҕабыт туһунан «Өрүү сүрэхпитигэр» диэн кинигэбитин дьэ, сүрэхтээтибит. Тэрээһиҥҥэ улуус баһылыга Михаил Соров, Тыа хаһаайыстыбатын салайааччы Михаил Хаптагаев кэлэн ыалдьыттаатылар. Ону сэргэ, аҕабыт бииргэ 1984 сылтан ЯПУ-га үөрэммит соҕолоро кэлэн күндү ыалдьыт буоллулар, хамаанда туруоран көхтөөхтүк кытыннылар. Биир дойдулаахтарбар, аймахтарбар, чуолаан аҕабыт аатын сүгэр оскуолабыт кэлэктиибигэр, дириэктэр Оксана Николаевна Гуляева махталбын тиэрдэбин.
Тэрээһиммитигэр анал ааттары туттартаатыбыт. Ол курдук, бастыҥ оонньооччулар анал бириистэри сүүйдүлэр. Бастыҥ оонньооччу Семен Сабарайкин, бастыҥ нападающай Аркадий Ефимов, бастыҥ туруорааччы Назар Турнин, бастыҥ көмүскээччи Игорь Бурнашев.
Ульяна Захарова, edersaas.ru