Ахсынньы 4 күнүгэр Таатта улууһун Туора Күөл нэһилиэгэр «Идэһэ -2020» диэн тэрээһин үрдүк таһымнаахтык ааста. Бу туһунан нэһилиэк баһылыгын солбуйааччы Любовь Ефимова санаатын үллэһиннэ.
— Нэһилиэкпитигэр үгэс быһыытынан ыытыллар дьоһун тэрээһиммитигэр чулуу үлэһит дьону чиэстээтибит. Ол курдук, нэһилиэкпит аҕа баһылыга Олег Дмитриевич Осипов нэһилиэккэ тыа хаһаайыстыбатын салаатыгар үлэлээбит Обутова Д.Н. улуус тыатын хаһаайыстыбатын управлениетын аатыттан «Таатта улууһун тыатын хаһаайыстыбатын бэтэрээнэ», Аянитов В.В. «Таатта улууһун тыатын хаһаайыстыбатын бочуоттаах үлэһитэ» бэлиэлэри туттулар. Маны сэргэ, нэһилиэги аһынан-үөлүнэн хааччыйан олорор, бу соторутааҕыта киэҥ-куоҥ, сырдык, аныгылыы тутуулаах саҥа маҕаһыыны тутан үлэҕэ киллэрбит Юрий Турниҥҥа «Нэһилиэк сайдыытыгар кылаатын иһин» бэлиэни туттардылар. Кэргэнигэр Наталья Турнинаҕа «Дьүлэй нэһилиэгин бочуоттаах олохтооҕо» аат иҥэрилиннэ.
Төһө да дьаҥ өрө туран бүтүн дойду үрдүнэн саба бүрүүкээбитин үрдүнэн, Дьүлэй нэһилиэгин тыатын хаһаайыстыбатын сайдыытыгар бу ааһан эрэр сыл үтүө түмүктэри көрдөрдө. Ол курдук нэһилиэкпигэр «Хаһаайыстыбаны кэҥэтии» анал ааттарга Егор Неустроев, көтөр иитиитигэр дьоһун үлэни саҕалаабыт Иванна Захарова тигистилэр. «Аҕам саастаах хаһаайыстыба» ааты сааһын тухары бааһынай хаһаайыстыба тэринэн таһаарыылаахтык үлэлиир Терентий Павлович Егоров, оттон «Эдэр кэскиллээх хаһаайыстыба» аатын быйыл саҥа хотон тутан 16 сүөһүнү кыстыкка киллэрбит Роман Сыромятников, «Үрүҥ илгэни үрүлүтээччи» ааты Христина Егорова ыллылар.
Маны таһынан быһа эпиир нөҥүө элбэх бириистээх лотерея оонньонно.
Ульяна Захарова, «Саха сирэ» хаһыат, edersaas.ru