Маны аах Уопсастыба

«Таатта түмсүү» биир дойдулаахтарыгар харчынан уонна наадалаах тэрилинэн көмөлөстө

Бүгүн  «Таатта түмсүү» уопсастыбаннай добровольческай ыстаабы кытта Таатта улууһугар баҕа өттүнэн баһаары умулларар дьону мунньан ыыттылар.

Бу туһунан Таатта улууһуттан биир дойдулаахтар түмсүүлэрин салайааччыта Владимир Аржаков иһитиннэрэр:

 СӨ Бырабыыталыстыбатын солбуйааччы Дмитрий Садовников Аллараа Бэстээххэ туоруур паром сырыытыгар, Дьокуускай куорат баһылыга Евгений Григорьев баһаар уотун умуруора барар дьоҥҥо оптуобус биэрэн  көмөлөстүлэр.

Дьокуускай куорат олохтоохторо, Таатта улууһуттан төрүттээх дьон  317 600 солк. хомуйан,  эбии 50 уу кутар суумка (РЛО) атыылаһан ыыттыбыт. Бу олус наадалаах тэриллэри суһаллык ыытаары Таатта улууһун батсаап-бөлөхтөрүгэр көрдөһүү сурук ыытааппытын кытта, тута «777 такси» суоппара Константин Новгородов тахсан, кининэн дойдубутугар Тааттаҕа көмөҕө ыыттыбыт. Ранецтар бүгүн тиийэ охсон, бу түүн дьон баһаары бохсууга туттуохтара. 

Олус тыҥааһыннаах уонна эппиэтинэстээх кэмҥэ дьоммутугар биир дойдулаахтарын көмөлөрүттэн уонна өйөбүллэриттэн күндү  суох.  

Елена ПОТОЦКАЯ, edersaas.ru.

 

0
0
Telegram @edersaas20