Ытык Күөлгэ «Сатабыл» оҕо айымньытын дьиэтин педагогтара Ян Степанов, Степан Соркомов уонна Федот Ермолаев «Эдэр программист» айар холбоһук иитиллээччилэрин кытары оҕо толкуйун сытыылыыр бэртээхэй остуол оонньуурун хомуурун тобулан таһаардылар.
edersaas.ru
Өбүгэлэрбит оҕону иитиигэ үтүмэн үйэлэр түгэхтэриттэн илдьэ кэлбит муударастарын дьүөрэлиир оонньуур хомуура «Өркөн өй» диэн ааттаммыт. Билиҥҥи оҕолор чааһы чааһынан гаджеттарга таттаран олороллоро, биллэн турар, кинилэр доруобуйаларыгар олус охсуулаах. Оттон «Өркөн өй» ол гаджеттары кэбэҕэстик солбуйар кыахтаах.
Хомуурга Таатта улууһун “монополията”, дуобат, хабылык, хаамыска, тыксаан уонна өйү сытыылыыр-сынньар икки оонньуур киирэллэр. “Монополия” оҕону үбү-харчыны сатаан туттарга, араас балаһыанньаттан мындырдык тахсарга үөрэтэр.
Манна Таатта улууһун нэһилиэктэрэ, ытык бэлиэ сирдэрэ, Ытык Күөллээҕи киинэ тыйаатыра, маҕаһыыннар, такси паарката киирэллэр. Сатабылы сайыннарар, өйү-санааны сытыылыыр, быһата, оҕону олоххо-дьаһахха бэлэмнээх буоларга иитэр оонньуур хомуурунан үстэриттэн үөһэ саастаах оҕолор оонньуохтарын сөп. Улуус олохтоохторо “Өркөн өйү” олус биһирээн, бэркэ атыылаһан эрэллэр.
Анжелика АЛЕКСЕЕВА, «Саха сирэ» хаһыат? edersaas.ru. сайтыгар анаан