Таатта улууһун эдэр иитээччилэрин икки ардыларыгар ыытыллар“Педагогическай сулус” диэн куонкурус үгэскэ кубулуйбута төрдүс сыла. Туох барыта оҕо саастан төрүттээх диэн уйулҕа үлэһиттэрэ этэллэр. Оҕо саадыттан саҕалаан иитиллииттэн хайдах киһи-хара буолан тахсара улахан тутулуктаах. Онон эдэр иитээччилэргэ аналлаах, кинилэр таһымнарын үрдэтэр соруктаах куонкурус туһата улахан буолуохтаах.
Ульяна ЗАХАРОВА, «Саха сирэ» хаһыат, edersaas.ru
Быйылгы куонкуруска “Бастыҥ педагогическай уопут” диэн ааты ылан Туора Күөл нэһилиэгин “Кэскил” оҕо саадын иитээччитэ Луиза Прокопьева кыайыылааҕынан тахсыбыт.
Бу туһунан Луиза Егоровна санаатын үллэһиннэ:
— Маннык хабааннаах куонкуруска бастакы кыттыым. Бэйэм икки кыыс оҕолоох ийэ буоларым быһыытынан, идэбин оҕону иитиини кытта ситиминээбиппиттэн кэмсиммэппин. Оҕолору кытта күннэтэ алтыһыы миэхэ үөрүүнү эрэ аҕалар. Куонкуруска эдэр иитээччилэр бэйэбит бырайыактарбытын көмүскээтибит. Мин бырайыагым тиэмэтэ: “Использование здоровьесберегающих технологий в работе с дошкольниками посредством нестандартного оборудования” диэн. Барытын оҕолору кытта бэйэбит оҥорон таһаарабыт. Холобур, роса бытыылкатыттан, «Киндер сымыытыттан», эргэ фломастертан оонньуурдары, малы-салы оҥоробут. Инникитин даҕаны бу куонкурус ыытыллан, эдэр үлэһиттэри үлэҕэ көҕүлээтин диэн баҕа санаабын этиэм этэ уонна бииргэ үлэлиир кэллиэгэм Оксана Гуляеваҕа махталбын тиэрдиэм этэ.
Ульяна ЗАХАРОВА, «Саха сирэ» хаһыат, edersaas.ru
