Бүтүн дойду үрдүнэн биллэриллибит Тыйаатыр сылыгар биһиги өрөспүүбүлүкэбит 53 Норуодунай тыйаатыра көхтөөхтүк кыттар.
Ол курдук, бэҕэһээ олунньу 14 күнүгэр, Дьокуускайга А.С.Пушкин аатынан Нуучча академическай тыйаатырын сценатыгар буолбут дойду театральнай марафонун бэлиэтин туттарыы сиэрин-туомун кэмигэр СӨ култууратын уонна духуобунай сайдыытын миниистирэ Юрий Куприянов Таатта норуодунай тыйаатырыгар өрөспүүбүлүкэтээҕи театральнай марафон бэлиэтин туттарда.
Эстэпиэтэни бастакынан таатталар туппуттара, норуодунай тыйаатырдар марафоннарын саҕалыыр чиэс кинилэргэ сүктэриллибитэ түбэспиччэ буолбатах.
—Биһиги бу, театральнай марафон бүгүн уматыллыбыт улахан, сырдык уотуттан сулус уматарга быһаарынныбыт. Лоп курдук 60 сыл анараа өттүгэр Саха АССР Миниистирдэрин сэбиэтин уурааҕынан Саха сиригэр бастакы норуодунай тыйаатыр төрүттэммитэ. Ол – Платон Ойуунускай аатынан Тааттатааҕы норуодунай тыйаатыр! Онон, чуолаан бу айар кэлэктиип өрөспүүбүлүкэ норуодунай тыйаатырдарын марафонун саҕалыаҕа. Марафон сылы быһа ыытыллыаҕа уонна күһүн норуодунай тыйаатырдар көрүү-бэстибээллэринэн түмүктэниэҕэ, — диэн туран миниистир Юрий Куприянов норуодунай тыйаатырдар эстэпиэтэлэрин саҕалыыр бэлиэни Таатта улууһун Култууратын, духуобунай сайдыытын управлениетын начаалынньыгар Гаврил Вырдылиҥҥа уонна Платон Ойуунускай аатынан Тааттатааҕы норуодунай тыйаатыр режиссеругар Валентина Бурнашеваҕа туттарда.
—Бастакынан саҕалыыр олус долгутуулаах уонна эппиэтинэстээх. Бу, өрөспүүбүлүкэтээҕи марафон бэлиэтэ Сомоҕолоһуу сылыгар Саха сирин 53 норуодунай тыйаатырдарыгар барыларыгар тиийиэҕэ уонна сомоҕолуоҕа! — диэн Гаврил Вырдылин этиитин А.С.Пушкин аатынан Нуучча тыйаатырын саалыгар тобус-толору мустубут дьон дохсун ытыс тыаһынан көрүстүлэр.
Татьяна МАРКОВА, «Саха сирэ» хаһыат, edersaas.ru
СИА уонна ааптар хаартыскаҕа түһэриилэрэ