Таатта улууһугар ыарыыны бопсор суһал ыстаап иһитиннэрбитинэн, атырдьах ыйын 14 күнүнээҕи туругунан, ковиднайга 12 (+1) эмтэнэр, провизорнайга 4 (+4), таһыттан этэнээччи 15 (-1).
edersaas.ru
Нэһилиэктэринэн ыалдьыыга саамай элбэх киһи улуус киинигэр Ытык Күөлгэ — 51 (34) уонна Харбалаах нэһилиэгэр 9 киһи ыалдьыбыт. Бу туһунан Харбалаах нэһилиэгин баһылыга Альберт Кулачиков маннык кэпсээтэ:
«Бу күннэргэ биһиги нэһилиэкпитигэр 9 киһи ыалдьан нэһилиэк суһал миэрэ ылан оҕо былаһааккаларын саптыбыт. Дьиэҕэ 38 киһи хааччахтанан олорор. Тоҕус киһи Ытык Күөлгэ балыыһаҕа сытар. Тастан кэлэр дьон, ону сэргэ оҕолор хонтуруола суох сылдьан ыарыыны таһыахтарын сөп диэн сабаҕалыыбыт. Онон нэһилиэгим олохтоохторугар видеоиһитиннэрии оҥордум. Ыарыы тарҕамматын туһуттан оҕолору хонтуруоллуур наада.»
Биирдиилээн түгэннэр Чычымахха, Дьохсоҕоҥҥо тахсыбыттар. Улуус үрдүнэн уопсайа 75 киһи ыалдьыбыт, онтон үтүөрбүтэ — 47. Бэйэлэрин хааччахтанар киһи ахсаана 262. Маны сэргэ, ыарыы тарҕамматын туһугар өрөбүл күннэргэ маҕаһыыннары, уопсай дьиэлэри санитарнай дезинфекциялыыр үлэни ыытар булгуччулааҕын суһал ыстаап сорудахтаата.
Ульяна Захарова, edersaas.ru