Саха норуотун духуобунаһын, төрүт култууратын уонна уус-уран литэрэтиирэтин биһигэ буолбут ытык Таатта улууһун хаһыата “Таатта” тэриллибитэ 80 сыллаах үбүлүөйүн бэлиэтээтэ.
“Таатта” хаһыат улуус хаһыаттарыттан биир “кырдьаҕастара”, холобурга турар бастыҥ үлэлээхтэрэ буолар. Манна араас сылларга эрэдээктэрдэринэн уонна айар үлэһиттэринэн бэйэлэрин суолларын-иистэрин хаалларан Михаил Капустин, Дмитрий Павлов, Нариман Гоголев, Иван Аргунов, Николай Яковлев уо.д.а. курдук талааннаах суруналыыстар үлэлээбиттэрэ. Аҕа көлүөнэ олохтообут үтүө үгэстэрин, баай уопутун Елена Софронова, Ольга Корякина-Умсуура, Анастасия Морхоева, Семен Неустроев, Александр Постников-Сындыыс, Петр Самсонов-Бүөтүр Хара о.д.а. дьоһуннук салҕаабыттара.
Билигин кылаабынай эрэдээктэр Анна Посельская салалтатынан эрэдээксийэ уон үс киһилээх дьоҕус эрээри дьоһун кэлэктиибэ улуус социальнай-экономическай сайдыытыгар бэйэтин кылаатын киллэрэр, саҥа сонуннары сойуппакка тиэрдиигэ, ааспыт кэми үйэтитиигэ, үтүө үлэһит дьону сырдатыыга таһаарыылаахтык үлэлиир. Ол түмүгэр, 80 сыллаах үбүлүөйүн “Таатта” хаһыат элбэх ааҕааччылаах, эрэллээх уопсастыбаннай кэрэспэдьиэннэрдээх итиэннэ хаһыаты таһынан кинигэни бэчээттээһиҥҥэ эмиэ үлэлээн көрүстэ.
Аҥардас быйыл Былатыан Ойуунускай төрөөбүтэ 125 сылыгар анабыл хоһооннор, ыстатыйалар “Эрдэ турбут сэһэнэ, хойут турбут хоһооно” диэн хомуурунньуктарын, Былатыан Ойуунускайы үйэтитиигэ ыытыллыбыт үлэ хронологическай ыйынньыгын, кыраайы үөрэтээччи Егор Андросов араас сылларга хаһыакка таһааттарбыт ыстатыйаларын хомуурунньугун, уран тарбахтаах маастардар Изабелла Элякова-Илгийээнэ уонна Арина Большакова альбомнарын, олоҥхону толорооччу Раиса Маркова үлэтин сырдатар дьоҕус кинигэни бэчээттээбит!
Хаһыат 80 сыллаах үбүлүөйүгэр суруналыыстарга анаан үгүс тыл үтүөтэ этилиннэ, бастыҥнар наҕараадаланнылар, араас сылларга үлэлээбит бэтэрээннэр чиэстэннилэр.
Раиса Сибирякова, «Саха сирэ» хаһыат, edersaas.ru