Таатта балыыһата эһиил үлэҕэ киириэҕэ

Бөлөххө киир:

“Доруобуйа харыстабыла” национальнай бырайыак “Доруобуйа харыстабылын бастакы сүһүөҕүн саҥардыы” эрэгийиэннээҕи бырагырааматын чэрчитинэн, Таатта улууһун киин балыыһатын саҥа таас дьиэтэ тутулла турар.

Таатта улууһун киин балыыһатын кылаабынай бырааһа Сардаана Кононова иһитиннэрбитинэн, билигин эркини устукатууркалааһын уонна үллүйүү үлэтэ түмүктэннэ. Электрическэй ситими тардыы, түннүктэри олордуу, насос ыстаансыйатын туруоруу үлэтэ 90 % оҥоһуллан турар. Канализационнай ситимин тардыы үлэтэ 80 % бүттэ, тас эркинин бүрүйүү саҕаланна.

Онон Ытык Күөл сэлиэнньэтигэр тутуллар балыыһа саҥа уораҕайа 2023 сыл сэтинньитигэр киирэрэ былааннанар. Үлэ хаамыытыгар былаантан хаалыы суох. Улууска 16 тыһыынчаттан тахса киһи олорор. Нэһилиэнньэ доруобуйатын көрүүгэ-истиигэ бу саҥа дьиэ төһүү күүс буолуоҕа. Олохтоохтор балыыһа комплекса тутулларын тэһийбэккэ-тулуйбакка күүтэллэр.

3 этээстээх, 4000 кв. миэтэрэ иэннээх дьиэҕэ симиэнэҕэ 200 киһи сылдьара суоттаныллар. Балыыһа аныгы комплекса “кыһамньылаах поликлиника” саҥа ирдэбиллэрин учуоттаан тутуллар. Исписэлиис быраастар кэбиниэттэрин сэргэ көмпүүтэр томографтаах, рентгеннээх, УЗИ-лаах, ФГДС-таах  диагностика отделениета,  функциональнай  диагностика кэбиниэтэ, күнүскү сытар балыыһа баар буолуоҕа.

2021-2023 сылларга доруобуйа харыстабылын бастакы сүһүөҕүн саҥардыы бырагырааматыгар Саха сирэ федеральнай бүддьүөттэн 6,5 миллиард солкуобайы ылбыта. Бу хаһан да буолбатах түгэн.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

+1
0
+1
0
+1
0
+1
0
+1
0
+1
0
+1
0