Чэгиэн-чэбдик, чөл олох иһин туруулаһааччылар күүстээх санааларын хоруона хамсыга булгуруппат.
Учуутал күнүн көрсө, Таатта уонна Амма улуустарын оскуолаларын успуорду өрө тутар үөрэнээччилэрин икки ардыларыгар куйаар ситиминэн сэргэх күрэхтэһии ыытылынна.
Бу туһунан Таатта улууһуттан Ытык Күөллээҕи И.Г.Федосеев аатынан оҕо успуорка оскуолатын буоксаҕа тириэньэрэ, СӨ Үөрэҕириитин туйгуна Николай Бысыин сырдатта.
—Үөрэх эйгэтин үлэһиттэрин күнүгэр анаан, куйаар ситиминэн тэрийэн ыыппыт күрэхтэһиибитигэр икки улуустан барыта 28 оҕо үөрүүнэн кытынна. Амматтан оҕо успуорка оскуолатын Мээндигитээҕи филиалыгар иккис сылын тириэньэрдиир, өрөспүүбүлүкэ биллиилээх спортсмена, кикбоксиҥҥа норуоттар икки ардыларынааҕы успуорт маастара Алексей Уваров дьарыктыыр үөрэнээччилэрин күрэхтэһиннэрдэ. Тааттаттан сүрүннээн Ытык Күөл оҕо успуорка оскуолатыгар дьарыктанар үөрэнээччилэр кытыннылар.
Икки күн устатыгар ырааҕы ыстаныыга, ыскакаалкаҕа, сиргэ сытан анньыныыга, сүүрүүгэ, о.д.а. көрүҥнэргэ сүргэлэрэ улаханнык көтөҕүллэн, эрбии тииһин урдук эгил-тэгил эристилэр. Онон улуустар бэйэлэрин истэригэр түмүктэрин көрөн, онон кыайыылаахтар быһаарылыннылар. Хас биирдии көрүҥҥэ кыайыылааҕынан тахсыбыт оҕолорго грамоталара куйаар ситиминэн тиэрдиллэр.
Күрэхтэһии кэнчээри ыччат бириэмэни көдьүүстээхтик атаарарын, чэгиэн олоҕу өйүүрүн уонна биһириирин көрдөрөр сыаллаах-соруктаах тэрилиннэ. Итиэннэ, учууталлар, тириэньэрдэр, үөрэнээччилэр хоруона хамсыга сатыылыыр кэмигэр, дьиэҕэ бүгэн таах олорон биэрбэтэхтэрин, сэргэхтэрин, олоххо көдьүүстээх сыһыаннаахтарын көрдөрөр.
Оҕолор күрэскэ бэлэмнэнэр кэмнэригэр санитарнай ирдэбиллэр барыта тутуһулуннулар. Бэйэ икки ардыгар тэйиччи сылдьыы тутуһулунна. Кинилэр тус бэйэ доруобуйатын көрүнэри, харыстыыры таһынан, дьон-сэргэ, аҕам саастаахтар чэгиэн буолалларын, этэҥҥэ сылдьалларын туһугар кыһаналлар, өйдүүллэр», — диэн этэр тириэньэр Николай Николаевич.
—Күрэхтэһиигэ оҕолор түмсүүлээх, сомоҕолоһуулаах, эппиэтинэстээх буолаллара өссө төгүл көһүннэ. Манна даҕатан эттэххэ, спордунан дьарыктанар оҕолор уопсай физическэй күүстэрин кэтэнэн көрө сылдьар үгэстээхтэрэ инникитин бэйэлэригэр туһалаах буолара саарбахтаммат. Оттон төрөппүттэр өрүү өйүүр, өйдүүр чугас дьоммутунан буолаллар. Бу да сырыыга кинилэр күрэхтэһии ыытылларын истээт, наһаа биһирээбиттэрэ. Ордук уол оҕоҕо болҕомто ууруллара хайаан да наадатын бэлиэтээбиттэрэ, махтаммыттара, — диэтэ. Түмүккэ, Николай Николаевич куйаар ситиминэн тэрийэр күрэхтэһиилэригэр улуустары хабыыны кэҥэтэн, элбэтэн биэрэр санаа үөскээбитин эттэ. «Биирдии көрүҥҥэ чопчу анаан тэрийиэххэ сөп эбит дэстибит. Холобур, биир нэдиэлэҕэ сүүрүүгэ, иккис нэдиэлэҕэ ыстаҥаҕа, үһүс нэдиэлэҕэ кылыыга, о.д.а. Оччоҕуна санааттан санаа үөскээн, өссө сайдан, ситэриллэн иһиэҕэр эрэл улахан, — диир кини.
Учуутал күнүнэн бары педагогтарга, педагогическай үлэ бэтэрээннэригэр итии-истиҥ эҕэрдэтин тиэртэ. Чэгиэн, чөл олоҕунан итиэннэ бары ирдэбиллэри тутуһан хоруона хамсыгын хам баттыырга тирэх буолуоҕуҥ диэтэ.