Таатта улууһун Алдан нэhилиэгэр отчуот сэргэхтик ааста. СӨ сыана кэмитиэтин салайааччыта Антонина Винокурова салайааччылаах бөлөх Алдан нэһилиэгин саҥа хочуолунайын, социальнай эбийиэктэри, боротуока биэрэгэ сиҥнэ турарын көрдө.
Нэһилиэнньэ тутуллан, үлэлии тутар улахан кыамталаах хочуолунайга сатаан холбоммот кыhалҕалаахтарын туһунан бэлиэтээн кэпсээтилэр. Үп боппуруоһа түргэнник быһаарыллан, кэлэр кыстыкка баҕалаах ыал бары холбоноро буоллар диэн олохтоох нэһилиэнньэ баҕа санаатын эттэ. Билигин бу хочуолунайга 27 эрэ ыал холбонон олорор. Иккис туруорсар боппуруостара — интэриниэт киириитэ. Сибээс арааһа баар эбит да, бииригэр да интэриниэт суох. Оптоволокно лиинийэтэ уот ситиминэн кэлэрэ эмиэ кэккэ ыарахаттардаах.
Маны сэргэ 1963, 1967 сыллардаахха тутуллубут оҕо уһуйааннарын оннугар саҥа дьиэ тутуллуон наадата этилиннэ.
Тыһыынчаттан тахса нэһилиэнньэлээх Таатта улууһун биир тутаах нэһилиэгэ өрөспүүбүлүкэ бырабыыталыстыбатыгар этиитэ, боппуруоһа элбэх. Ити боппуруостартан саамай тыын —киин ититии ситимигэр холбонуу быһаарылларын дьон-сэргэ күүтэ хаалла.
Ньургуйаана Иванова, edersaas.ru