“Роспотребнадзор” управлениетын дааннайдарынан, балаҕан ыйын 29 күнүнээҕи туругунан 202 киһи, ол иһигэр Дьокуускайга 124 киһи коронавируснай инфекциянан ыалдьыбыта биллибит.
Өрөспүүбүлүкэтээҕи суһал ыстаап салайааччытын солбуйааччы Ольга Балабкина эппитинэн, кэнники кэмҥэ сөптөөх миэрэлэр ылылланнар, Сунтаар, Мииринэй, Үөһээ Бүлүү улуустарыгар ыарыы аҕыйаабыт.
— Билигин саамай уустук балаһыанньа Тааттаҕа бэлиэтэнэр. Холобур, Ытык Күөлгэ хас да ыал ыалынан ыарыйдылар. Ону тэҥэ, Бүлүү, Уус Алдан улуустарыгар балаһыанньа уустугурар. Сүрүннээн дьиэ кэргэн иһигэр бырааһынньыктар, элбэх киһилээх тэрээһиннэр ыытылланнар, сыстыһаллар.
Оттон Дьокуускайга ыарыы ахсаана элбээһинэ күһүн дьон уоппускаттан тахсан, кэлии-барыы элбээбитин кытары сибээстээх. Хотугу улуустарга коронавируһу утары быһыыны ылыы бырыһыана үрдүк, кэлиини-барыыны хонтуруоллууллар, онон эпидемиологическай балаһыанньалара үчүгэй, — диэн Ольга Балабкина эттэ.
Суукка иһигэр өрөспүүбүлүкэҕэ барыта 5092 анаалыс оҥоһуллубут. Пандемия саҕаланыаҕыттан барыта 1 464 518 анаалыс оҥоһуллубут.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru