Маны аах Успуорт

Тааттаҕа уон бастыҥ хамаанда хапсаҕайга күрэхтэһиэҕэ

Ил Дархан Айсен Николев Ыйааҕынан  ахсынньы 3 күнүттэн Саха сиригэр успуорт дьаһалларын Роспотребнадзору кытары сөбүлэһиллэн ыытыы көҥүллэммитэ. СӨ физическэй култуураҕа уонна успуорка миниистирэ Иннокентий Григорьев иһитиннэрбитинэн, халандаарынай былааҥҥа киллэриллибит успуорт күрэхтэһиилэригэр кыттарга ковиды  утары быһыыны ылбыт эбэтэр номнуо ыалдьан аһарбыт спортсменнар, судьуйалар кыттыахтара.  Онон сибээстээн, спортивнай күрэхтэһиилэр саҕаланан, дуорааннара иһиллэр буолан эрэллэр.

Ол курдук,  бу өрөбүллэргэ, ахсынньы 18-19 күннэригэр, Таатта улууһун Ытык Күөлүгэр  Хапсаҕай федерациятын Куубагын  иһин хамаанданан хабыр-хапсыһыы буолуоҕа. Быйылгы улахан күрэхтэһиигэ күүстээх уон хамаанда кыттар.  Ирдэбил быһыытынан ааспыт сыллааҕы күрэхтэһиигэ бастыҥнарын көрдөрбүт, итэҕэппит  муниципальнай тэриллиилэр сүүмэрдэммит хамаандалара кыттар чиэскэ тиксэллэр.
Хамаанда састаабыгар 6 эр киһи уонна 5 успуорт бэтэрээнэ киирэр. Биллэр төрүөтүнэн бу күрэхтэһиигэ эдэр уолаттар кыттыбаттар.

Хайа улуустар кытталларый? Ол курдук,  Үөһээ Бүлүү, Таатта, Мэҥэ Хаҥалас, Чурапчы, Нам, Ньурба, Кэбээйи, Уус Алдан, Дьокуускай куорат уонна Сунтаар улуустарын сүүмэрдэммит хамаандалара икки күн атахтарыгар тура тэбинэн туран киирсиэхтэрэ.  Кубок ирдэбилин быһыытынан  хамаандалар икки аҥы хайдаллар.  Бөлөхтөргө арахсыыны сэрэбиэй быһаарар.  Санатар буоллахха, былырыын Куубак иһин күрэхтэһии коронавирус дьаҥыттан сылтаан буолбатаҕа. 2019 сыллаахха  Горнай улууһун Бэрдьигэстээҕэр ыытыллыбыт күрэхтэһиигэ Үөһээ Бүлүү бөҕөстөрө  бастаан, аар-саарга аатырбыттара.

 

 Күрэхтэһии бырагыраамата

 

Ахсынньы 17 күнэ (бээтинсэ)

10:00-17:00 – мандаат хамыыһыйата;

16:00-17:00 –  судьуйаларга уонна хамаанда бэрэстэбиитэллэригэр аналлаах сэминээр;

17:00-18:00 –  ыйааһыннааһын;

Ахсынньы 18 күнэ (субуота)

10:00-13.00 – күрэхтэһии саҕаланар;

13:00-14.00 – эбиэт;

14.00-14.30 – Күрэхтэһиини үөрүүлээхтик аһыы;

14.30-18.00 –  күрэхтэһии.

Ахсынньы 19 күнэ (өрөбүл)

10:00-14.30 – муҥутуур кыайыылааҕы быһаарыы, түмүктүүр киирсиилэр, кыайыылаахтары наҕараадалааһын.

15.00 –  күрэхтэһээччилэр өтөхтөрүн быһаллар.

 

0
0
Telegram @edersaas20