Тааттаҕа уодаһыннаах дьаҥы бохсууга үлэ тиһиктээхтик салҕанар

Коронавирус дьаҥа тарҕаныытын бохсорго үлэлэһэр Тааттатааҕы суһал ыстаап улууска балаһыанньа хайдаҕын иһитиннэрдэ.

Балыыһаҕа 12 киһи киирбититтэн, алта киһи анаалыһа дьаҥҥа хаптарбытын бигэргэппит.

—Өрөспүүбүлүкэ үрдүнэн CОVID-19 тарҕаныыта  намтыы илигинэн, Ил Дархан ыйааҕынан бэс ыйын 14 күнүгэр диэри хааччахтыыр дьаһаллар уһатылыннылар.

Роспотребнадзор Тааттатааҕы салаатыгар бүгүҥҥү күҥҥэ 7 киһи коронавирус дьаҥа тарҕаныытын бохсууга, сэрэтиигэ, санитарнай-эпидемиологическай ирдэбиллэри тутуһууга, хонтуруоллуурга үлэлэһэ сылдьар.

Волонтердары кытары үлэлиир өрөспүүбүлүкэтээҕи киинтэн 200 ас-үөл нобуора кэлэн, нэһилиэктэринэн үллэһиллэр. Маны нэһилиэктэр олонтердара дьиэлэригэр олорор кырдьаҕастарга бигэргэтиллибит испииһэгинэн тиэрдэллэр.

Бэҕэһээҥҥиттэн саҕалаан аармыйаҕа сулууспалаабыт уолаттарбыт кэлитэлээн эрэллэр. Кинилэри Дьокуускай куораттан дойдуларыгар тиэйэн аҕалыы тэриллибитэ. Уолаттар бары тута Ытык Күөлгэ обсерваторга киллэриллиэхтэрэ, хааччахтаныы болдьоҕун устатыгар ирдэбили тутуһан онно олоруохтара.

Манна даҕатан эттэххэ, тэрилтэлэртэн, биирдиилээн дьонтон көмө араас көрүҥэ оҥоһулла турар. Ол курдук,  Ытык Күөл олохтооҕо Раиса Семеновна Маркова оҕолоро Дьокуускай куораттан илиини суунар,  дьиэни, таҥаһы дезинфкциялыыр сириэстибэлэри улуус обсерватордарыгар уонна балыыһаҕа көмөлөһөн ыыттылар. Түгэнинэн туһанан өйөбүл буолар, көмөлөһөр сырдык санаалаах үтүө  дьоммутугар барҕа махтал тылларбытын тиэрдэбит.

Улууспут дьонугар ыалдьыбакка этэҥҥэ сылдьар туһугар дьон мустар сиригэр сылдьыыны, кэлиини-барыыны кыччатаргытыгар,  мааскалаах, бэрчээккилээх сылдьыыны, бэйэ икки ардыгар тэйиччи турууну тутуһаргытыгар, оҕолор мустууларын бопсоргутугар ыҥырабыт. Бары ирдэбиллэри тутустахпытына, уодаһыннаах дьаҥы кыайыахпыт.