“Эрэл” Тааттатааҕы социальнай-реабилитациялыыр киин “Сыгынахтаах аартык” диэн социальнай бырайыагы саҕалаата. Бу бырайыак сокуоннай саастарын туола илик оҕолор быраабы кэһэллэрин утары үлэни күүһүрдэр, айар үлэни көҕүлүүр сыаллаах.
Бу тэрээһин 2025 сылга буолуохтаах “Манчаары оонньуулара” спартакиадаҕа бэлэмнэнии чэрчитинэн ыытыллар. 2021 сыл бэс ыйын 10-12 күннэригэр норуодунай суруйааччы Амма Аччыгыйа айымньыларынан мастан кыһан оҥоруу куонкуруһа маастардарга, саҥа саҕалааччыларга уонна оскуола үөрэнээччилэригэр анаан буолуоҕа. Биэс күн устата Таатта ытык-мааны сирдэригэр, сквердэргэ, аллеяларга туруохтаах скульптурнай айымньылар оҥоһуллуохтара.
Муус устар 27 күнүгэр Чычымахха бэлэмнэнии үлэлэрэ саҕаланнылар. “Эрэл” социальнай-реабилитациялыыр киин Чычымах олохтоохторун кытары скульптураларга анаан бэрэбинэлэри бэлэмнээтилэр. Амма нэһилиэгин баһылыга Степан Соров уонна олохтоохтор Никита Охотин, Иван Иванов, Данил Афанасьев, Егор Софронов, Егор Васильев үлэҕэ көхтөөхтүк кытыннылар. Манна икки тыраахтар уонна “Урал” массыына үлэлээтэ.
Ангелина Васильева, “Саха сирэ” хаһыат, edersaas.ru