Тааттаҕа Саха сирин коммунальнай хаһаайыстыбатын бастакы наркомун 120 сылын бэлиэтээтилэр

Ааптар: 
Бөлөххө киир:

Балаҕан ыйын 22 күнүгэр Саха АССР  коммунальнай хаһаайыстыбатын бастакы народнай хамыһаара Ананий Андреев төрөөбүтэ 120 сылын Саха сирин коммунальнай хаһаайыстыбатын үлэһиттэрэ уонна энергетиктэрэ бэлиэтээтилэр.

СӨ ОДЬКХ уонна энергетикэ миниистиэристибэтин пресс-сулууспата иһитиннэрбитинэн, суолталаах тэрээһин Ананий Андреев төрөөбүт дойдутугар, Таатта улууһун Боробулугар буолан ааста. Манна СӨ ОДЬКХ уонна энергетикэ миниистирэ Вячеслав Емельянов, Ил Түмэн тутууга, ОДЬКХ уонна энергетикэ боппуруостарыгар сис кэмитиэтин бэрэссэдээтэлэ Яков Ефимов, нэһилиэк уопсастыбаннаһа Ананий Андреев аатынан искибиэргэ мемориалга сибэкки дьөрбөтүн уурдулар.

Ананий Кононович сахалартан бастакынан инженер-теплоэнергетик идэтин баһылаабыта.  Дьокуускайдааҕы киин электростанцияны өр кэмҥэ салайбыта. Биһиги, кини  дьыалатын салҕааччылар, Саха сирин бастакы народнай хамыһаара Ананий Андреев ыыппыт үлэтин уонна кини курдук дьоммутун инники күҥҥэ тутан чиэстиибит уонна бэлиэтиибит, — диэн бэлиэтээтэ Вячеслав Емельянов.

Таатта улууһугар ОДЬКХ үлэтигэр анаммыт сыалай мусуой комплекса баарын бэлиэтиир тоҕоостоох.  Ол курдук, Булгунньахтаах уонна Куонаан алаастарыгар анал мемориаллар бааллар.  Ананий Андреев аатын үйэтитиигэ СӨ “ОДЬКХ” ГУП Тааттааҕы филиала, Дьохсоҕон нэһилиэгин олохтоохторо уонна идэлээх сойуустар улахан үлэни ыыталлар.

«Ананий Андреев Саха сиригэр ОДЬКХ уонна энергетика салаата сайдыытыгар олугу уурбута», — диэн эттэ норуот дьокутаата Яков Ефимов.

Тэрээһин чэрчитинэн миниистир Вячеслав Емельянов Саха АССР  коммунальнай хаһаайыстыбатын бастакы народнай хамыһаара Ананий Андреев аатынан 50 тыһыынча солкуобайдаах истипиэндьийэни АГАТУ иккис кууруһун устудьуона Григорий Поповка туттарда. Бу маннык наҕарааданан сыл аайы техническэй идэни талбыт Дьохсоҕон орто оскуолатын выпускниктара наҕараадаланаллар.

Маны таһынан, бу күн Ананий Андреев аатынан түөлбэҕэ саҥа хочуолунайы тутууга анаммыт мэҥэ бэлиэни туруордулар.

Елена ПОТОЦКАЯ, “Саха сирэ” хаһыат, edersaas.ru

Хаартыска — СӨ ОДЬКХ уонна энергетикэ миниистиэристибэтин пресс-сулууспата.

+1
0
+1
0
+1
0
+1
0
+1
0
+1
0
+1
0