Доруобуйа

Тааттаҕа саҥа балыыһа тутуллар

2021-2023 сылларга Саха сирин доруобуйатын харыстабылын бастакы сүһүөх звенотун модернизациялааһын бырагырааматыгар Саха сирэ федеральнай  бүддьүөттэн 6,5 миллиард солкуобайы ылбыта (хаһан да буолбатах түгэн)

 

Биллэрин курдук, бырагыраамаҕа доруобуйа харыстабылын эбийиэктэрин тутуу, саҥардыы уонна олохтоохтук өрөмүөннээһин, мэдиссиинискэй тэриллэри, тырааныспардары ылыы уонна каадырынан хааччыллыы дьаһаллара киирэллэр.

Бу бырагырааманан Таатта улууһун Ытык Күөл сэлиэнньэтигэр үс мэндиэмэннээх поликлиника тутулла турар. 4000 кв. миэтэрэ иэннээх дьиэҕэ симиэнэҕэ 200 киһи сылдьара суоттаныллар.

«Балыыһа аныгы комплекса “кыһамньылаах поликлиника” саҥа ирдэбиллэрин учуоттаан тутуллар. Исписэлиис быраастар кэбиниэттэрин сэргэ көмпүүтэр томографтаах, рентгеннээх, УЗИ-лаах, ФГДС-таах  диагностика отделениета,  функциональнай   диагностика кэбиниэтэ, күнүскү сытар балыыһа баар буолуоҕа”, —  диэн Таатта улууһун оройуоннааҕы киин балыыһатын кылаабынай бырааһа Сардаана Кононова иһитиннэрдэ.

Саҥа балыыһа 2023 сыл иккис аҥаарыгар үлэҕэ киирэрэ былааннанар.

Надежда ЕГОРОВА, «Саха сирэ», edersaas.ru

0
0
Telegram @edersaas20