Тааттаҕа үс улахан баһаар бохсуллубут.
Сайын устатыгар Тааттаҕа 39 ойуур баһаара бэлиэтэммит, итинтэн 14 ураты харыстанар сиргэ диэн Yakutia-Daily.ru суруйар. Бүгүҥҥү күннээҕи чахчынан, үс улахан баһаар бохсуллубут.
Тыараһаҕа 100 га ойуур уонна 100 га сир-уот уокка былдьаммыт. Улуус баһылыга Михаил Соров иһитиннэрбитинэн, баһаары умуруорууга 54 киһи үлэлээбит, булууктаах үс тыраахтар уонна икки грузовой массыына туһаныллыбыттар. Игидэй нэһилиэгиттэн 20 км тэйиччи 40 га ойуур, 100-кэ чугаһыыр гаалаах сир умайбыт. Баһаары умуруорууга 34 киһи сылдьыбыт, үс тыраахтар, биир грузовой, биир уу таһар массыына туһаныллыбыттар. Уус Тааттаттан 11 км сиргэ, уот 10 га сири хаппыт. Уоту бохсууга 17 киһи, үс тиэхиньикэ үлэлээбит.
«Үс улахан баһаар эргитилиннэ. Уот кураантан уонна тыал быраҕарыттан барар. Онон дьон салгыы дьуһуурустубалыыллар», — диэбит Михаил Соров.
Кини Алексей Колодезников салайааччылаах өрөспүүбүлүкэтээҕи суһал ыстаапка көмөлөрүн иһин махтаммыт. «Уоту умуруорар тэриллэри, тиэхиньикэ саппаас чаастарын, ГСМ тута охсоммут уот бохсулунна. Билигин хонтуруолга тутан олоробут. Нэһилиэнньэлээх пууннарга, эбийиэктэргэ куттал суоһаабат. Норуот үлэлиир уонна кыраҕытык кэтиир», — диэбит улуус баһылыга.
+1
+1
+1
+1
+1
+1
+1