Бэҕэһээ Таатта улууһугар уһулуччу үөрүүлээх күн буолан ааста. Сүдү суолталаах Саха АССР тэриллибитэ 100 сыллаах өрөгөй күнүн бэлиэтиир дьоһун бырааһынньыгы тэрийдилэр. Бу үөрүүлээх күн Саха норуотун көҥүлүн уһаарсыбыт, кэскилин тэрийсибит уһулуччулаах судаарыстыбаннай диэйэтэл, көҥүл олох тойуксута Былатыан Ойуунускай үрдүк үтүө аатын төрөөбүт төрүт буоругар айхаллыы Дьокуускай куораттан уонна илин иҥээр улуустарыттан ыалдьыттар тоҕуорустулар.
Бырабыыталыстыба Бэрэссэдээтэлин солбуйааччы С.В. Местников, Ил Дархан Сүбэһитэ Г.Д. Никонов, СӨ Ил Түмэн Судаарыстыбаннай мунньаҕын Бэрэссэдээтэлин солбуйааччы Виктор Губарев, биир дойдулаахпыт Ил Түмэн Судаарыстыбаннай Мунньаҕын тутууга, олох-дьаһах хаһаайыстыбатыгар уонна энергетикэҕэ бастайааннай кэмитиэтин бэрэссэдээтэлэ Я.А. Ефимов, Ил Түмэн Судаарыстыбаннай Мунньаҕын доруобуйа харыстабылыгар, социальнай көмүскэлгэ, үлэҕэ уонна үлэлээх буолууга бастайааннай кэмитиэтин бэрэссэдээтэлэ В.И. Чичигинаров, Уус Алдан баһылыга А.В. Федотов кэргэнинээн Марианна Федосьевналыын, Амма баһылыгын 1 солбуйааччы С.Н. Кузьмин, Чурапчы улууһун баһылыгын солбуйааччы С.Ф. Федоров уо.д.а. кыттыыны ыллылар. Ойуунускай киинэ түспүт Дэлбэрийбит алааһыгар кини тыыммыт салгынынан сайа тыынан, киһи буолан сириэдийэн тахсыбыт балаҕаныгар илэ сылдьан күүс-уох ыллылар, санааларыгар санаа эбиннилэр.
Өрөспүүбүлүкэ күнүн бэлиэтиир дьоро күҥҥэ «Гражданскай килбиэн» ураты бэлиэнэн Тааттатааҕы лиссиэй директора И.А. Сивцева, “Муниципальнай сулууспа туйгуна” бэлиэнэн Баайаҕа дьаһалтатын үпкэ-харчыга исписэлииһэ Е.А.Андросова наҕараадаланнылар. Таатта улууһугар норуот тылынан уус-уран айымньытын сайдыытыгар тус кылаатын иһин “Таатта улууһун Бочуоттаах Олохтооҕо” аат хоһоонньут, Саха Өрөспүүбүлүкэтин суруйааччыларын уонна норуоттар икки ардыларынааҕы суруйааччылар түмсүүлэрин чилиэнэ Колодезникова Ирина Афанасьевнаҕа иҥэрилиннэ. Таатта улууһун социальнай-экэнэмиичэскэй сайдыытыгар тус кылаатын, үгүс сыллаах үтүө суобастаах үлэтин иһин «Таатта улууһугар экэниэмикэ сайдыытыгар кылаатын иһин» муниципальнай бэлиэнэн Октябрьскай нэһилиэк бэтэрээнэ Полускина Мария Ивановна, үгүс истиэпэннээх муниципальнай бэлиэнэн Саха Өрөспүүбүлүкэтигэр Арассыыйа Федерациятын пенсионнай пуондатын салаатын, Таатта улууһунааҕы килийиэн сулууспатын сүрүннүүр эспиэрэ Тистяхова Саргылана Гаврильевна, Таатта улууһугар духуобунай сайдыыга, ону тэҥэ национальнай нэһилиэстибэни харыстааһыҥҥа, үөрэтиигэ уонна тарҕатыыга тус кылаатын иһин үһүс истиэпэннээх муниципальнай бэлиэнэн СӨ судаарыстыбаннай түмэлин специалиһа Барахова Марианна Егоровна наҕараадаланнылар.
Саха АССР тэриллибит өрөгөй үөрүүтүн 50-ча аттаах саха саарыннара уруйдаан-айхаллаан тэрээһини олус киэргэттилэр. Сомоҕолоһуу оһуокайа дьиэрэйдэ, сахалыы саҥа сатараата.
Былатыан Ойуунускай хараҥаҕа харбыалаһар хаалыылаах норуотун илбистээх тылынан уһугуннаран, өркөн өйдөөн, дохсун санаалаан, саталаах тылынан күүрдэн ыллыктаах аартыкка сирдээбитэ. Саха норуота үйэлэр тухары иитиэхтээн кэлбит сырдык ыра санааларын олоххо киллэрбит, биһиги сайдыыбытыгар муҥура суох кыахтары уонна кэскиллэри арыйбыт, норуот кэскилин туһугар өлөрүн кэрэйбэтэх чаҕылхай Былатыан сырдык аата саха аймаҕар мэлдьи тыыннаах буола туруохтун.
Анна Яковлева.