Таатта улууһугар култуура эйгэтигэр үлэлиир эр дьон түмсүү тэриннилэр.
Бэҕэһээ куйаар ситиминэн мунньах оҥордулар. Мунньаҕы Тааттатааҕы норуот айымньытын дьиэтин дириэктэрэ Гаврил Гаврильевич Вырдылин иилээн-саҕалаан ыытта. Кини бу уруккуттан баҕарбыт ыра санаатын олоххо киллэрдэ.
—Баҕа санаабын бииргэ үлэлиир дьонум олус сэргии, сэҥээрэ истибиттэрэ. Уолаттар тута өйөөн, көҕүлээн, ыра санаа кынатыгар олорон, хайдах үлэлэтэри, кэҥэтэри толкуйдаан барбыттара. Билигин култуура эйгэтигэр 40-тан тахса эр киһи үлэлиир. Ол иһигэр сэттэ салайааччы. Оттон бэҕэһээ тэрийбит мунньахпытыгар улууспут нэһилиэктэриттэн 33 киһи куйаар ситиминэн кыттыыны ылла.
Кэпсэтиибит сүнньүнэн, эр дьон түмсүүтэ уопсай субуотунньуктарга, үлэ үөрүйэҕин атастаһыыга, өрөспүүбүлүкэтээҕи култуура үлэһиттэрин спартакиадатыгар, араас күрэстэргэ, быыстапкаларга, аахсыйаларга кыттарга, хамсааһыннары тэрийэргэ үлэлиэхтээх. Дьон-сэргэ көхтөөхтүк кытынна, санааларын үллэһиннилэр.
Тааттатааҕы норуот айымньытын дьиэтигэр музыка устуудьуйатын салайар, СӨ култууратын туйгуна, гиирэ успуордугар улуус сүүмэрдэммит хамаандатын чилиэнэ Михаил Васильевич Варламов бэрэссэдээтэлинэн, СӨ култууратын үтүөлээх үлэһитэ Валентин Константинович Козлов сэкирэтээринэн талылыннылар. Хайысхаларынан эппиэтинэстээхтэринэн Тааттатааҕы норуот айымньытын дьиэтин дириэктэрэ Гаврил Вырдылин, завхоз Спартак Теряков, уоту-күөһү таҥан оҥорооччу Уйусхан Степанов, звукооператор Айсен Антоев, «Таатта» литературнай художественнай музейын дириэктэрэ Владимир Таппыров, Ытык Күөллээҕи «Сарыал» култуура уонна спорт киинин дириэктэрэ Алексей Тарасов, звукооператор Егор Мохначевскай, исписэлиистэр Иннокентий Шестаков, Прокопий Афанасьев, Былатыан Ойуунускай аатынан Чөркөөхтөөҕү судаарыстыбаннас түмэлин дириэктэрэ Михаил Аржаков, Чөркөөхтөөҕү түмэл дириэктэрэ Николай Попов, И.Д.Христофоров аатынан Баайаҕатааҕы оҕо ускуустубатын оскуолатын дириэктэрэ Дмитрий Апросимов, Н.Н.Туласынов аатынан Чөркөөхтөөҕү норуот айымньытын дьиэтин дириэктэрэ Афанасий Собакин уо.д.а талылыннылар. Сотору кэминэн кинилэр санааларын сааһылаан, толкуйдарын тобулан, түмэн, былааннарын билиһиннэриэхтэрэ.
Манна эбэн эттэххэ, улууспутугар тэриллибит эр дьон түмсүүтүн үлэтэ көдьүүстээҕэ көһүннэ. Онон кинилэри кытары ыкса алтыһан, сүбэлэһэн, санаа атастаһан, үлэ-хамнас улуус олохтоохторугар, уолаттарга, эдэр ыччакка, бары эр дьоҥҥо туһалаах буоларын туһугар дьулуһуохпут. «Эр дьон — олоҕу хамсатар күүс» диэн өбүгэлэрбит бэргэн этиилэрин суолдьут оҥостон хамсааһыннары таһаарар соруктаахпыт. Саҥа тэриллибит түмсүү үйэлээх, инникилээх, бары өттүнэн туһалаах буоллун диэн баҕа санаанан онлайн мунньахпытын түмүктээтибит.