Таатталарга коронавируһу утары үлэ күүһүрэр.
Сэрэтэр-өйдөтөр үлэни нэһилиэнньэҕэ киэҥник сырдатарга, ыарыыны утарар үлэни-хамнаһы тиһиктээхтик тэрийэргэ анал хамыыһыйа тэриллибитин, хонтуруол күүскэ ыытылларын туһунан Тааттаттан норуот айымньытын дьиэтин дириэктэрэ Гаврил Вырдылин иһитиннэрдэ.
Ол курдук, бастатан, аҕам саастаахтарга улахан болҕомто ууруллубут, сэрэтии үлэтэ ыытыллыбыт. Кинилэр уулуссаҕа быстах-остох тахсалларын бу ыарыы кутталланан турар кэмигэр тохтотоллоругар сэрэтэр үлэлэр ыытыллыбыттар. Волонтердар итиннэ күүскэ үлэлэһэллэрэ бэлиэтэнэр. Бу үлэни улуустааҕы ыччат отделын салайар Иван Иванов тэрийэр, дьаһайар. Волонтердар кыһалҕалаахха көмөлөһөргө бэлэмнэр. Маны сэргэ, Дьокуускай куоракка олорор Тааттаттан төрүттээх биир дойдулаахтарыгар өйдөтөр-сэрэтэр үлэлэр ыытыллыбыттар.
Элбэх кыбартыыралаах уопсай дьиэҕэ олорооччуларга дьиэлэригэр дезинфекциялааһыны оҥороллоругар, киириини-тахсыыны аҕыйатарга сорудахтар бэриллибиттэр. Оттон маҕаһыыннар, маркеттар үлэһиттэригр мааскалары хайаан да кэтэллэригэр ирдэбил туруоруллубут. Маныаха маасканы тигиигэ «Уйгу» иистэнэр сыах, «Сатабыл» эбии үөрэхтээһин киинэ, биир оскуола кэлэктиибэ уонна биирдиилээн дьон ылсыбыттар.
Кутталлаах ыарыы тарҕамматын туһугар туох баар ирдэбил тутуһуллара хонтуруолланарын, күҥҥэ үстэ анал рейдэлэр оҥоһуллалларын туһунан этиллэр.